ОВАА ДРОГА Е 50 ПАТИ ПОСИЛНА ОД ХЕРОИН – Двајца мажи се првите жртви на дрогата фентанил во овој регион

Две лица починаа во Хрватска од предозирање со фентанил, дрога која е 100 пати посилна од морфин и 50 пати посилна од хероин, потврдил за RTL психијатарот Иван Ќелиќ од Клиниката за психијатрија „Врапче“ пред два дена.

Станува збор за 40-годишни мажи, поранешни наркозависници кои во еден момент се лекувале во болницата.

„Официјалните токсиколошки наоди се уште се чекаат, но семејството кај починатиот пронашло пакетчиња фентанил, поради што се претпоставува дека се работи за предозирање со оваа конкретна дрога“, изјавил Иван Ќелиќ.

Хрватскиот институт за јавно здравје (ХЗЈЗ) денес објави соопштение во кое објаснува за каков лек се работи и предупредува за последиците од неговото консумирање.

Фентанил и помал број деривати на фентанил (алфентанил, суфентанил, ремифентанил и карфентанил) се користат како аналгетици и анестетици во хуманата и ветеринарната медицина.

Покрај тоа што се користи легитимно како дрога и за истражување, фентанил и неговите деривати имаат долга историја на нелегална употреба како замена за хероин и други опиоиди.

Фентанил и деривати на фентанил се поврзани со најмалку 137 смртни случаи во ЕУ во 2021 година. 88 лица починале во Германија, 18 во Литванија, 9 во Австрија, по 6 лица во Данска и Финска, 4 лица во Естонија, по 2 лица во Словенија и Португалија, а во Унгарија и Литванија по едно лице.