Путин нема да застане во Украина, вели Бајден

Зборувајќи заедно со францускиот претседател Емануел Макрон по разговорите во Париз, американскиот претседател Џо Бајден во саботата вети поддршка на Вашингтон за Киев во неговата битка против руската агресија, предупредувајќи дека Владимир Путин „нема да застане“ на Украина.

„Путин нема да застане во Украина“, рекол Бајден, пишуваат странските медиуми, пренесува Телеграф.

„Цела Европа ќе биде загрозена, нема да дозволиме тоа да се случи“, им рече Бајден на новинарите за време на неговата државна посета на Франција.

„САД стојат цврсто со Украина. Нема да заминеме, пак велам“, додаде тој.

Додека Макрон му рече на Бајден пред новинарите: „Ви благодарам, господине претседателе, што сте претседател на силата број еден во светот, но што го правите тоа со лојалност на партнер кој ги сака и ги почитува Европејците“.

И Бајден и Макрон во петокот се сретнаа со украинскиот претседател Володимир Зеленски во Париз, ветувајќи поддршка за украинската кауза.

Франција и САД, исто така, ќе ги удвојат нивните заеднички напори за да избегнат понатамошна ескалација на тензиите на Блискиот Исток, особено за да се намалат тензиите меѓу Израел и Хезболах во Либан, изјави Макрон за новинарите.

Макрон рече дека Париз и Вашингтон ја виделе ескалацијата на Иран во регионот и дека двете земји се решени да го применат потребниот притисок за да се запре трендот.