РАСТЕ БРОЈОТ НА ЖРТВИ – Ова се последиците од земјотресот во Јапонија: Обилните дождови им отежнуваат на спасувачите во потрагата по преживеани
Според последните податоци, бројот на жртвите во разорниот земјотрес со јачина од 7,6 степени според Рихтеровата скала што ја погоди Јапонија се искачи на 64, додека властите стравуваат дека под урнатините се затрупани уште десетици!
Затоа спасувачките екипи вложуваат големи напори за расчистување на урнатините, но нивните напори се отежнати поради обилните врнежи од дожд и ниските температури.
Мегаземјотрес го погоди полуостровот Ното во понеделник попладне по локално време.
Уништени се стотици куќи и бројни патишта, а по земјотресот избувнаа неколку големи пожари. Стотици луѓе се повредени, додека метеоролошкаta агенција објави дека во регионот се регистрирани повеќе од 200 земјотреси.
Се предупредува дека во наредните денови може да има земјотреси посилни од шест степени според Рихтеровата скала, што е вообичаено за таложење на тлото. Премиерот на Јапонија, Фумио Кишида, изјави дека степенот на штетата од земјотресот станува „се појасна“.
„Владата распореди спасувачки тимови за итни случаи, полиција и пожарникари во областа и прави се што може за да ги спаси преживеаните, но добивме извештаи дека се уште има многу луѓе кои чекаат да бидат спасени под срушените згради“, вели тој.
Спасувачките екипи имаат големи тешкотии да стигнат до северниот дел на полуостровот, каде што најмногу настрада инфраструктурата. Американскиот геолошки институт соопшти дека земјотресот од понеделникот бил најсилниот во регионот во последните четири децении.
Американската студентка Лорен Кален (21 г.) за BBC опишала како изгледал земјотресот во осумкатницата во која живее.
„Станав и неколку секунди подоцна алармот се огласи на сите телефони. Сè се случи доста брзо, требаше прво да размислиме што да правиме. Се скрив под масата. По неколку секунди тресењето престана. Сите работи во станот паднаа“, изјавила таа.
По земјотресот беа издадени предупредувања за цунами. Сепак, властите потврдија дека не се откриени неправилности во нуклеарните централи покрај Јапонското Море. Овој земјотрес потсети на 2011 година, кога се случи несреќа во нуклеарната централа кај Фукушима.
