Стево Пендаровски на 60. Безбедносна конференција во Минхен

Претседателот Стево Пендаровски од денес ќе учествува на 60. Безбедносна конференција во Минхен, Германија. 

Како што информира Кабинетот на претседателот Стево Пендаровски, претседателот на државата предвидено е да учествува на настанот „Дали Западен Балкан е дел од големата слика ? Мапирање на новата европска безбедносна архитектура“ во организација на Центарот за безбедносна политика од Белград и Центарот за безбедносна политика од Женева.

Стево Пендаровски ќе учествува и на настаните „Фокус на Балканот“ и „Насоката за трансатлантската заедница после Минхен“ организиран од Атлантскиот Совет.

За време на учеството на Безбедносната конференција во Минхен до 18. февруари, предвидено е претседателот Стево Пендаровски да оствари повеќе средби со дел од учесниците на собирот. Во фокусот на разговорите на претседателот Стево Пендаровски ќе биде европската интеграција и безбедносните состојби во регионот и во евро-атлантскиот простор.

Покрај Стево Пендаровски и претседателот на техничката Влада, Талат Џафери и министерот за надворешни работи, Бујар Османи, ќе учествуваат на 60. Безбедносна конференција во Минхен во чиј фокус годинава, како што соопшти владината прес-служба, е улогата на Европа во безбедноста и одбраната и значењето на проширувањето на ЕУ, во контекст на ситуацијата во Украина и случувањата на Блискиот Исток.