Страв и терор во Авганистан: Четворица мажи егзекутирани на стадиони пред 20.000 луѓе!
Четворица мажи осудени за убиство беа егзекутирани денеска на преполните стадиони низ Авганистан.
Еден ден претходно, локалните власти ги поканија функционерите и граѓаните да дојдат и да „учествуваат на настанот“, додека, како и обично, ги забранија сите камери и мобилни телефони за да спречат ширење на слики.
Двајцата мажи беа егзекутирани пред околу 20.000 луѓе собрани на стадионот во Кала-И-Нав, главниот град на северозападната провинција Бадгис, според исламскиот принцип на „кисас“ или одмазда, соопшти Врховниот суд.
Трет човек е егзекутиран во градот Зарањ, главниот град на провинцијата Нимроз во југозападниот дел на земјата.
Четвртиот беше погубен во Фарах, главниот град на истоимената провинција на запад.
Сите наредби за егзекуција беа потпишани од врховниот лидер на талибанците, емирот Хибатула Акуњада, кој живее повлечено во неговото јужно упориште Кандахар и управува со земјата со декрет или инструкции, се вели во соопштението на Врховниот суд.
Јавните егзекуции беа вообичаени за време на првиот талибански режим, помеѓу 1996 и 2001 година, но драстично се намалени откако Талибанците се вратија во Кабул во летото 2021 година.
Оттогаш, шест мажи се погубени за „убиство“: еден во ноември, тројца во февруари 2024 година, еден во јуни 2023 година и првиот во декември 2022 година.
