Страшните пожари во Турција и Грција уништуваат сè пред себе: Илјадници луѓе ги напуштија своите домови, има мртви! Стотици куќи изгореа! (ФОТО/ВИДЕО)
Пожарникарите се бореа со пожари во близина на Атина и на островот Крит во четврток, каде што илјадници луѓе беа принудени да ги напуштат туристичките одморалишта, додека пожарите во соседна Турција одзедоа најмалку два живота.
Повеќе од 5.000 туристи, хотелски работници и локални жители беа евакуирани од областа Иерапетра на јужниот брег на Крит, соопштија претставници на властите и хотелските здруженија. Мал број луѓе избегаа во морето и беа спасени од локални рибари и нуркачи.
Градоначалникот на Иерапетра, Манолис Франгулис, изјави дека пожарникарите работат на спречување на повторно палење и го користат моменталното намалување на јачината на ветерот.
– За среќа, никој не е повреден, но ситуацијата е тешка – рече тој.
Евакуираните туристи биле сместени во други хотели или ја поминале ноќта во затворена кошаркарска сала.
Неколку куќи и деловни објекти беа оштетени.
Волонтерите пронајдоа мртви домашни животни, некои изгорени живи додека беа врзани во шупи.
Пожарот во близина на пристаништето Рафина, околу 30 километри источно од Атина, ги прекина локалните фериботски услуги до островите. Полицијата одеше од врата до врата за да им помогне на постарите жители и да спроведе наредби за евакуација.
Во западна Турција , локален шумар загина додека се обидувал да го изгаси пожарот во близина на градот Одемиш , а 81-годишен жител починал од вдишување чад, соопштија властите. Ова се првите жртви во серијата пожари што принудија илјадници луѓе да избегаат.
Во меѓувреме, стотици пожарникари, поддржани од авиони и хеликоптери , се вклучени во гаснењето на пожарот во близина на крајбрежниот град Чешма, популарна летна дестинација, околу 190 километри западно од Одемиш.
Тој пожар, кој избувна во среда, доведе до евакуација на три населени места и затворање на патишта. Телевизиските снимки покажаа пламен како се пробива низ сува вегетација од двете страни на автопатот.
Во текот на изминатата недела, Турција се соочи со стотици пожари, влошени од силни ветрови, екстремна топлина и ниска влажност . Тие сега се претежно под контрола, но оштетија или уништија околу 200 куќи.
Летните пожари се вообичаени и во Грција и во Турција, а експертите предупредуваат дека климатските промени дополнително ги влошуваат условите.
Во среда навечер, турскиот парламент усвои историски закон за климата, чија цел е да се постигнат нулти емисии на јаглерод диоксид до 2053 година. Законот предвидува формирање тело за управување со пазарот на јаглерод, кое ќе ги надгледува напорите за намалување на емисиите на стакленички гасови.
Законот доаѓа во време кога Турција се повеќе се соочува со последиците од климатските промени – од екстремна топлина до продолжени суши, велат експертите.
– Како медитеранска земја, Турција е многу ранлива на климатските промени – изјави Гизем Коч, адвокат во британската еколошка организација ClientEarth.
– Најизразена ранливост е сушата и недостатокот на вода во одредени региони, но поплавите и другите екстремни временски настани се случуваат сè почесто.
