Трамп и Путин разговараа повеќе од еден час: Рускиот лидер најави одмазда за украинскиот напад врз базите

Американскиот претседател Доналд Трамп денес објави дека разговарал по телефон со рускиот претседател Владимир Путин повеќе од еден час. Тој го оцени разговорот како добар, но додаде дека не верува оти тоа ќе доведе до моментален мир.

За време на разговорот, шефот на Кремљ изјави дека Москва мора да одговори на неодамнешниот украински напад со беспилотни летала врз руските воени бази.

„Тукушто разговарав по телефон со рускиот претседател Владимир Путин. Разговорот траеше околу еден час и 15 минути. Разговаравме за нападот на Украина врз паркираните руски авиони, како и за разни други напади што се случуваат од двете страни. Беше добар разговор, но не разговор што ќе доведе до моментален мир. Претседателот Путин многу цврсто изјави дека ќе мора да одговори на неодамнешниот напад врз аеродромот“, напиша Трамп на мрежата Truth Social.

Притоа, тој се осврна на невидениот масовен напад со беспилотни летала длабоко во руската позадина, за време на кој Украина нападна руски воени бази во текот на викендот.

Заменик-претседателот на Рускиот совет за безбедност и поранешен претседател Дмитриј Медведев претходно им се закани на Украинците со „неизбежна“ одмазда.

Двајцата претседатели разговараа и за Иран.

„Разговаравме и за Иран и фактот дека времето за одлука на Иран за нуклеарно оружје брзо се намалува и таа мора брзо да се донесе! Му кажав на претседателот Путин дека Иран не може да има нуклеарно оружје и мислам дека се согласивме за тоа. Претседателот Путин предложи да учествува во разговорите со Иран и дека може да помогне брзо да се затвори ова прашање. Мислам дека Иран се двоуми по оваа многу важна тема и многу наскоро ќе ни треба дефинитивен одговор!“, додаде шефот на Белата куќа.

Разговорот меѓу Путин и Трамп се одржа во време кога американскиот Конгрес разгледува значително заострување на санкциите против Русија, вклучително и предлог за царини до 500% за земјите што купуваат руска енергија. Санкциите сè уште не се гласани, а „Фокс њуз“ шпекулира дека гласањето го ограничува влијанието на Трамп.

Кратко пред телефонскиот разговор меѓу Трамп и Путин, американскиот државен секретар Марко Рубио и Андриј Јермак, шеф на кабинетот на украинскиот претседател Володимир Зеленски, се сретнаа во Вашингтон. Јермак по состанокот објави дека двајцата се согласиле за координирана акција меѓу Украина и САД.