Јовановиќ: Македонија ризикува санкции ако данокот за богатите компании се намали за 5 отсто

Бранимир Јовановиќ, познат економски аналитичар, изрази сериозна загриженост за можните меѓународни последици од најавеното намалување на данокот на добивка за големите компании.

Според него, доколку Македонија ја намали стапката на данокот на добивка на 5 проценти, ризикува земјата да биде ставена на црната листа на ОЕЦД и Европската унија како земја која не соработува во даночните прашања.

„Доколку Владата се држи до својата цел, Македонија може да биде прогласена за офшор даночна дестинација, што би имало катастрофални последици за угледот на државата. Ова е сценарио кое може сериозно да го наруши имиџот на Македонија на меѓународната сцена“, предупредува Јовановиќ.

Тој додава дека со оваа политика Македонија не само што нема да привлекува нови инвестиции, туку ќе се соочи и со можни санкции од меѓународната заедница.

„Владата мора да разбере дека таквата акција е нестабилна и може да има далекусежни негативни ефекти за земјата“, рече Јовановиќ.