Бидете внимателни со витаминот Д: неговата консумација може да има сериозни несакани ефекти

Иако витаминот Д често се препорачува за зајакнување на имунитетот и здравјето на коските, важно е да се знае дека неговиот прекумерен внес може да има сериозни последици за организмот.

Кога  витаминот Д  се зема во поголеми количини отколку што му се потребни на телото, доаѓа до прекумерно акумулирање на калциум во крвта, наместо во коските, што може да предизвика голем број непријатни, па дури и опасни несакани ефекти. Порталот „Крени Здраво“ предупредува на симптоми кои можат да укажуваат на предозирање со овој „сончев витамин“.

Губење на апетит, гадење и повраќање

Еден од првите знаци на вишок витамин Д може да биде чувство на мачнина и гадење од храна. Калциумот во покачени концентрации го иритира дигестивниот систем, што може да предизвика губење на апетит, гадење, па дури и повраќање. Можна е и абдоминална чувствителност на допир – сите овие се индикатори дека телото се обидува да го исфрли вишокот калциум.

Замор, слабост и чувство на лошо здравје

Чувството на исцрпеност може да биде резултат на многу состојби, но ако неодамна сте почнале да земате витамин Д и се чувствувате послабо од вообичаено, премногу калциум може да биде причина. Покрај заморот, можни се вртоглавица, раздразливост или општо чувство на слабост и малаксаност.

Често мокрење и дехидрација

Несаканите ефекти од земањето витамин Д вклучуваат често мокрење и дехидрација. За да се ослободат од вишокот калциум, бубрезите почнуваат да работат поинтензивно – што доведува до често мокрење, дури и ако не внесувате повеќе течности. Со текот на времето, ова може да резултира со дехидрација, жед, главоболки и суви мукозни мембрани, вклучувајќи ги очите и носот.

Болка во коските и акумулација на калциум во ткивата

Иако витаминот Д е познат како сојузник на здрави коски, премногу од него може да предизвика болки во коските и зглобовите. Вишокот калциум може да се насобира во меките ткива, крвните садови или зглобовите, предизвикувајќи вкочанетост, болка или непријатност.

Невролошки симптоми

Конфузија, тешкотии при концентрирање и таканаречена „ментална магла“ можат да бидат знаци дека нивоата на калциум се превисоки. Таквата состојба го попречува преносот на нервните сигнали и рамнотежата на течностите во телото, што може да се манифестира и преку раздразливост или дезориентација.