Кина го тестира најголемиот амфибиски авион во светот

Кина започна со тестови за сертификација на најголемиот амфибиски авион во светот, што претставува значајна пресвртница во нејзините воздухопловни и поморски способности.

Станува збор за авион AG600, развиен од корпорацијата за воздухопловна индустрија на Кина (AVIC) и кој е првенствено дизајниран за поморски патроли и операции за пребарување и спасување.

Според AVIC, овој авион е клучен за Кина бидејќи може да стигне до која било локација во Јужното Кинеско Море од Хеинан за најмногу четири часа. Планот е авионот да се користи за превоз на товар или патници меѓу островите под контрола на Кина.

Државната агенција CGTN објави дека Центарот за сертификација за пловидбеност на Авијациската управа на Кина издаде сертификат TIA за првиот модел од семејството на големи амфибиски авиони AG600. Конфигурацијата, состојбата и безбедноста на авионот ги исполнуваа барањата на TIA.

Исто така, ова е чекор напред кон добивање на сертификатот потребен за летови.

Семејството на големи амфибиски авиони се развива како клучна напредна аеронаутичка опрема за подобрување на можностите за спасување во итни случаи.

Амфибискиот авион од серијата AG600 има единствена конфигурација, која се состои од интегриран горен дел во форма на авион и долен дел во облик на брод. Според AVIC, ова семејство на амфибиски авиони е првиот саморазвиен голем цивилен авион за специјални намени во Кина. Тој е дизајниран да ги задоволи потребите за гаснење шумски пожари, за поморско спасување и други итни спасувачки мисии.

Авионот се развива со фокус на амфибиските способности, разновидноста на повеќе модели и серискиот развој. Може да биде опремен со разновидна опрема за да ги задоволи потребите на корисниците во различни области, вклучувајќи следење на море, откривање ресурси и превоз на патници и карго.

Првиот тест беше извршен во 2017 година, додека авионот леташе над морето во 2020 година.

Дизајнот на авионот AG600 е дел од планот на Кина да ги подобри своите воздухопловни способности со авиони од домашно производство, вклучувајќи ги транспортните авиони Y-20 и патничкиот авион C919. Исто така, Кина има намера да го модернизира производството до 2027 година, а AG600 е особено важен за транспорт до кинеските бази во Јужното Кинеско Море.

Овој авион може да полета и слетува на морето во бранови високи до два метри и да лебди два часа. Исто така, ќе игра улога во зајакнувањето на безбедноста на пловидбата по поморскиот пат на свилата.