Мицкоски: Извештајот на ГРЕКО потврдува дека Македонија ја напушта ерата на селективна правда и политички имунитет

Кога ја презедовме одговорноста за водење на државата, наидовме на институции заплеткани во мрежа од злоупотреби, клиентелизам и систематска корупција. Корупцијата не беше исклучок – таа беше правило. Правдата беше селективна. Владата беше во служба на моќни интереси, а не на граѓаните. Ова беше сликата што ја наследивме. Затоа, една од првите и најрешителни битки што ја започнавме беше токму – борбата против корупцијата на високо ниво. Во оваа битка, денес имаме и прва голема потврда од меѓународната заедница. По години институционален мрак, извештајот на ГРЕКО објавен вчера е сигнал дека Македонија се движи напред – кон функционален систем.

Ова го изјави премиерот Христијан Мицкоски на денешната седница на Националниот комитет за спречување на насилен екстремизам и борба против тероризмот.

Мицкоски рече дека ГРЕКО потврдил дека Македонија ја напушта ерата на селективна правда и политичка неказнивост.

„Со затворањето на постапката за хармонизација, Групата на држави против корупција при Советот на Европа испрати јасна порака: дека има видливи резултати, конкретни подобрувања и силна политичка волја за отстапување од старите практики. Ова не е само административно признание – тоа е институционална потврда“, рече премиерот.

Според него, за прв пат по долго време, државата не е предмет на критика, туку на благодарност – за сериозниот напредок во борбата против корупцијата.

„Ова нè охрабрува, но исто така нè оптоварува со одговорност. Борбата против корупцијата не е декларација – туку системска промена која сега добива меѓународна потврда“, рече тој.

Мицкоски рече дека работата на Националниот комитет за спречување на насилен екстремизам и борба против тероризмот е од особено значење за стабилноста, безбедноста и отпорноста на државата.

„Денешната сесија не ја третираме само како координативна, туку како клучна точка во еден поширок напор: напор за создавање систем кој навреме ги препознава ризиците, ефикасно реагира и обезбедува долгорочна заштита за граѓаните. Насилниот екстремизам и тероризмот не се само закани за безбедноста – тие се индикатори за подлабоки слабости во системот. Затоа, борбата против нив не може да се изолира, туку мора да се спроведува паралелно со зајакнувањето на институциите, владеењето на правото и јавната доверба“, рече тој.

Тој рече дека екстремизмот, радикализацијата и насилството обично цветаат таму каде што државата е слаба, а институциите се корумпирани. Затоа, нашата стратегија е јасна: градење безбедна држава, со функционални институции, професионална полиција и отпорно општество .

„Овој Комитет не е симболичен, туку оперативен инструмент. И очекувам сите учесници – од безбедноста, општеството, образованието и локалната самоуправа – да дејствуваат координирано, без одложување и без калкулации. Продолжуваме со истата сериозност, без еуфорија, но со целосна свест. Бидејќи битката за стабилна, безбедна и праведна Македонија не се добива со зборови – туку со дела“, рече Мицкоски за време на својот говор на сесијата.