“МОРА ДА ЈА РАЗГЛЕДАМЕ ЦЕЛОКУПНАТА ДОКУМЕНТАЦИЈА“ – Инспектори од Државниот инспекторат за труд започнаа со надзорот во М-НАВ
Тројца инспектори од Државниот инспекторат за труд (ДИТ) денес влегоа во М-НАВ и почнаа со инспекцискиот надзор. Инспекторите со надзорот ќе продолжат и утре, бидејќи станува збор за голема и обемна документација, соопшти директорката на ДИТ, Весна Томовска.
Весна Томовска вели дека ќе ја разгледуваат документацијата околу вработувањата, како и тоа дали синдикатот има најави за штрајк согласно Законот.
„Во делот на вработувањето, дали се реализирани согласно Закон, огласот исто дали е согласно со Закон. Значи во моментов тие две работи ќе се проверуваат, ќе се проверуваат последните вработувања, потоа дали синдикатот има најава за штрајк и дали тоа се е во согласно со законот“, вели Весна Томовска.
![](https://vocentar.com/wp-content/uploads/2024/01/%D0%92%D0%B5%D1%81%D0%BD%D0%B0-%D0%A2%D0%BE%D0%BC%D0%BE%D0%B2%D1%81%D0%BA%D0%B0.webp)
Таа додаде дека најверојатно почетни информации за еден ваков надзор ќе има за повеќе од една недела, бидејќи инспекторите мора да ја разгледаат обемната документација, а потоа ќе разговораат и со синдикалниот лидер.
„Значи мора да ја разгледаме целокупната документација“, вели Весна Томовска.
Инспекторите на ДИТ во М-НАВ влегоа по настаните во оваа институција.