Напад врз полициска станица во Турција: Малолетник уби двајца полицајци, граѓани го совладаа (вознемирувачко видео)
Во турскиот град Измир утрово се случи сериозен напад врз полициската станица во кој беа убиени двајца полицајци, а еден беше ранет, потврдија турските власти.
Нападот се случил околу 8:30 часот наутро во населбата Балчова, кога 16-годишен ученик од трето одделение во средно училиште, идентификуван како Ерен Биѓул, дошол пред полициската станица Салих Исѓорен со пушка и пукал. Според официјалните информации, еден полицаец бил ранет, додека двајца други биле убиени.
Ранетиот полицаец е префрлен во Истражувачката и клиничка болница на Универзитетот „Докуз Ејлул“, каде што му е укажана медицинска помош.
Напаѓачот се обидел да избега откако отворил оган, но граѓаните го совладале во спектакуларна акција – напаѓачот прво бил застрелан, а потоа удрен од минувач со стол, што им овозможило на другите да го соборат на земја и да го предадат на полицијата. Видеото од апсењето набрзо се прошири на социјалните мрежи во Турција.
Министерот за внатрешни работи Али Јерликаја потврди дека напаѓачот е уапсен, додека министерот за правда Јилмаз Тунч објави дека Обвинителството во Измир отворило детална истрага за овој напад.
Мотивите зад нападот на малолетникот се уште се непознати, а јавноста во Турција беше шокирана од фактот дека станува збор за средношколец кој го донел оружјето од својот дом.
