НАСА откри меѓуѕвездена комета што минува низ Сончевиот систем

На почетокот на јули, НАСА забележа исклучително редок астрономски феномен, откривањето на меѓуѕвездена комета што моментално минува низ Сончевиот систем.

Кометата, наречена 3I/ATLAS, првпат беше забележана од телескопот ATLAS (Asteroid Terrestrial-impact Last Alert System) лоциран во Рио Уртадо, Чиле, и беше потврдено дека доаѓа надвор од нашиот Сончев систем, од правецот на соѕвездието Стрелец.

Откритието го привлече вниманието на научната заедница бидејќи е само третиот познат меѓуѕвезден објект што минува низ Сончевиот систем.

Анализите собрани од неколку опсерватории, вклучувајќи ги и оние во САД, покажаа дека првите траги од кометата всушност биле забележани на 14 јуни, но биле идентификувани дури подоцна преку архивски податоци.

Кометата моментално се наоѓа на растојание од околу 670 милиони километри од Сонцето, а се очекува да го направи своето најблиско приближување до Сонцето на 30 октомври, на растојание од 1,4 AU (околу 210 милиони километри), што е малку во рамките на орбитата на Марс.

Важно е да се напомене дека кометата не претставува никаква закана за Земјата, бидејќи нејзината најблиска точка до Земјата сепак ќе биде оддалечена повеќе од 1,6 астрономски единици (околу 240 милиони километри).

Астрономите ширум светот моментално ја анализираат неговата големина и физички карактеристики, а објектот ќе биде видлив преку телескопи од Земјата до септември.