Необични брачни совети од пар кој е заедно 75 години

Повеќето луѓе сонуваат за љубов што трае цел живот, но малкумина всушност ја остваруваат. Брачниот пар Сали и Џозеф Литлвуд, кои сега имаат 99 и 98 години, се доказ дека таквата љубов е можна. Во брак од Втората светска војна, тие заедно преживеале многу предизвици и промени, а нивната приказна се чита како мешавина помеѓу историска книга и љубовен роман.

По 75 години заедно, тие ја открија својата, за многумина, изненадувачка тајна за среќен брак.

,,Советот што би им го дала на младите луѓе што се венчаваат денес е да се расправаат многу, но секогаш да не заборават да го надминат тоа“, изјави Сали за Дејли Меил.

Таа додаде: „Никогаш не вреди да се крчкате во себе. Луѓето секогаш се расправаат, а за 75 години имавме многу од нив, но клучот е да продолжите понатаму“.

Сали, исто така, истакна дека денешните парови честопати прерано се вселуваат заедно, не знаејќи што навистина сакаат еден од друг: „Ако ќе се вселите кај некого или ќе се ожените со него, мора да знаете дека го сакате.“

Џозеф додаде дека верува дека причината за високата стапка на разводи е исчезнувањето на додворувањето.

„Кога бевме млади, луѓето се додворуваа, а тоа веќе не е случај“, објасни тој.

Сали се сети и на нивните почетоци – првиот танц, чоколадите по забавата и годините кога разменуваа љубовни писма додека Џозеф беше во војска.

Нивните деца, Вин и Теренс, исто така сведочат за моќта на родителската љубов.

„Мислам дека работата е во тоа што моите родители навистина се трудат и работат на својата врска“, рече Вин.

Нивната приказна е потсетник дека бракот не е бајка без проблеми, туку заеднички напор и посветеност. Или како што Вин го сумираше: „Моите родители го погодија џекпотот“.