Николоски: Со финансиска поддршка на Велика Британија ќе се гради железничкиот коридор Табановцe – Гевгелија
Македонија добива историски поголем обем на средства за реализација на капитални проекти со договорот што ќе го потпишеме Влада со Влада во четврток во Лондон, изјави вицепремиерот и министер за транспорт Александар Николоски откако Владата денес го одобри Договорот за стратешко партнерство со Обединетото Кралство во врска со партнерство за реализација на инфраструктурни проекти.
Целта на Договорот е да се воспостави партнерство за поддршка на имплементацијата на инфраструктурни проекти во секторите здравство, транспорт, технологија, енергетика, дигитална трансформација и други критични сектори во Република Македонија. Проектите планирани според договорот се изградба и реконструкција на железничкиот Коридор 10 од Табановце до Гевгелија, кој, како што најави Николоски, треба да чини околу една милијарда и 900 милиони евра до две милијарди евра, додека изградбата на Клиничката болница, Медицинскиот факултет и Студентскиот дом во Штип, целосната реконструкција на Клиничката болница во Тетово и изградбата на нова болница со нов здравствен центар во Кичево, околу 200 милиони евра. За овие проекти, од шесте милијарди евра планирани според договорот, би се потрошиле од 2,1 до 2,2 милијарди евра, кои, според инсистирањето на Македонската страна, би биле вратени по завршувањето.
Николоски најави дека е многу важно што во согласност со Договорот, ќе се разменуваат знаења и практики со користење на експертиза од Владата на Обединетото Кралство и британските деловни субјекти за поддршка на имплементацијата на проекти, но и трансформацијата на јавната администрација и приватниот сектор со експертиза од бизнис заедницата на Обединетото Кралство и владините агенции.
„Знаењето ќе се споделува во здравството, транспортот, технологијата, енергетиката и клучните критични сектори, додека експертизата од Велика Британија ќе се користи за градење на капацитетите на Владата на Република Македонија. Оваа соработка ќе биде во согласност со постојното законодавство, прописи и политики што се на сила во секоја од двете земји. Учесниците ќе работат заедно за да истражат можности за мобилизирање средства за финансирање на проекти и, што е многу поважно, Владата на Велика Британија ќе го потврди својот интерес и капацитет преку Програмата за финансирање на извозот или UKEF, ставајќи на располагање пет милијарди фунти или шест милијарди евра за проекти во Македонија. Нагласувам дека ова ќе биде финансирање на проекти и финансирање што ќе оди исклучиво со имплементација на проекти. Ова е рамка што не значи дека ќе се користи во целост, туку е рамка што е достапна и што можеме да ја користиме“, рече Николоски.
Тој нагласи дека е горд што Владата и тој лично добиле официјална покана од Владата на Обединетото Кралство за потпишување на меѓувладиниот договор на 22 мај. Во делегацијата ќе бидат и вицепремиерот и министер за животна средина Изет Меџити, министерката за образование Весна Јаневска, директорот на Јавното претпријатие за железничка инфраструктура Синиша Ивановски и други соработници.
„Ќе имаме два плодни дена на соработка. Утре имаме средби со министерот за внатрешни работи на Велика Британија и министерот за одбрана, а имаме и средби со претставници на Инструментот за финансирање. Во четврток е главната церемонија, а исто така во четврток ќе имам средба и со директорот на „Рајанер“, од каде очекувам да произлезат нови летови до Скопјe“, најави вицепремиерот Николоски.
Тој нагласи дека ова е историски момент и дека 22 мај ќе биде датум што долго ќе се памети во историјата на Македонија бидејќи тоа е најобемниот договор досега што Македонија го постигнала со која било земја.
„Ова не е било која земја, тоа е втора светска сила, земја со која имаме одлична соработка во рамките на НАТО Алијансата, таа е дел од западната цивилизација, таа ги става на располагање најмногу ресурси и за мене тоа е најважниот политички момент бидејќи влегуваме во партнерство со клучен западен сојузник кој јасно ја дефинира политиката на Владата, но и позицијата на Македонија како прозападно ориентирана држава и држава која ги почитува евроатлантските вредности. Исто така, ми е мило што Обединетото Кралство објави дека постигнало договор со ЕУ, што значи дека имаме три главни сојузници на Македонија во еден пакет, имено ЕУ, Обединетото Кралство и САД“, нагласи вицепремиерот Николоски.
Според него, условите за отплата и каматните стапки за средствата од договорот ќе бидат подобри од кое било задолжување досега. Финансирањето ќе биде поврзано со проектот. „Кај некои проекти, рокот на достасување ќе биде пократок, кај некои подолг, тоа ќе зависи од состојбата на економијата и буџетот на Македонија, но и од реализацијата на проектите“, рече Николоски.
Во врска со каматните стапки, тој рече дека „првично е можно да се движиме под стапката на инфлација“, но деталите ќе бидат откриени за еден до еден и пол месец.
