Песков: „Реална е заканата на Украина дека ќе ја нападне нуклеарната централа Запорожје со беспилотни летала или ракети“

0

 – Русија денес тврдеше дека заканата за саботажа на нуклеарната централа Запорожје е „голема“, повикувајќи се на разузнавачки извештаи што укажуваат на намерата на Украина да изврши напади користејќи беспилотни летала или проектили.

„Ситуацијата е многу напната бидејќи заканата од саботажа од режимот во Киев е многу реална. Саботажа што може да има катастрофални последици“, изјави портпаролот на Кремљ, Дмитриј Песков, на брифингот со новинарите во Москва.

Портпаролот ги обвини украинските власти дека се бескрупулозни во изборот на средства за постигнување на нивните цели, истакнувајќи дека се преземаат мерки за ублажување на ризиците.

Реакцијата на портпаролот на Кремљ се случи два дена откако Украина тврдеше дека Русија планира „терористички напад“ и одржа официјален состанок за да разговара за можните идни сценарија во врска со централата во Запорожје.

Москва денес тврдеше дека Киев го исклучил главниот далновод што се поврзува со електраната.

Ренат Карча, советник на Росенергоатом, подружница на руската државна нуклеарна агенција Росатом, за рускиот државен телевизиски канал „Росија-24“ изјави дека има разузнавачки податоци што укажуваат на намерата на Украина да изврши напади врз електраната користејќи беспилотни летала или проектили.

Тој тврди дека украинските војници може да извршат напад со нуклеарен отпад од јужноукраинската нуклеарна централа користејќи ја ракетата „Точка-У“.

ДОГОВОР ЗА ЖИТО

На прашањето за изгледите за продолжување на Црноморската иницијатива за жито, која важи до 17 јули, портпаролот на Кремљ, Песков, рече дека нема основа таа да биде продолжена.

Истовремено, тој нагласи дека Руската Федерација сѐ уште официјално не ја објавила својата одлука за судбината на Договорот.

„Ќе го објавиме тоа навреме (бидејќи) има уште време. Исто така, има уште време да се исполни делот од договорите што се однесуваат на нашата земја“, рече тој.

Турција, ОН, Русија и Украина го потпишаа Договорот во Истанбул во јули минатата година за обновување на извозот на жито од трите украински пристаништа на Црно Море што беше стопиран по почетокот на војната во Украина во февруари минатата година.

Договорот беше обновен неколкупати оттогаш и беше продолжен за уште два месеца на 18 мај.

Песков одби да ја коментира одлуката на Кина за воведување рестрикции за извоз на ретки метали почнувајќи од 1 август, велејќи дека не може да каже дали Русија ќе го следи примерот бидејќи ова прашање е во надлежност на Владата.

Портпаролот ги отфрли информациите дека кинескиот претседател Ши Џинпинг го предупредил својот руски колега Владимир Путин да не користи нуклеарно оружје како „фикција“.

„По резултатите од оваа важна посета беа обезбедени многу информации и имаше изјави за печатот. Суштината на преговорите беше јасно наведена во документите што беа усвоени. Сè друго е фикција “, нагласи тој.