Полска ќе ја гради првата мала нуклеарна централа во Европа BWRX-300

Првата мала модуларна нуклеарна централа во Полска, или SMR, ќе биде изградена во Влоцлавек, објави во четврток енергетската компанија Орлен. Ова е прв проект од ваков вид во Европа.

Полска ќе го изгради првиот мал модуларен нуклеарен реактор (SMR) во Европа BWRX-300, што претставува голем чекор во транзицијата на земјата од јаглен кон почиста енергија, објави енергетскиот гигант Орлен.

„Првата мала нуклеарна централа BWRX-300 во Европа ќе биде изградена во Полска. Ние ја градиме енергијата на утрешнината“, рече извршниот директор на „Орлен“, Иренеуш Фафара.

Одлуката следеше по договор меѓу „Орлен“ и „Синтос Грин Енерџи“. „Орлен“, најголемата полска енергетска компанија, планира да има во функција најмалку две SMR-електрани со вкупен капацитет од 0,6 GW до 2035 година.

Според договорот, двете компании ќе основаат заедничко вложување наречено Orlen Synthos Green Energy (OSGE), при што секоја од нив ќе има по 50 проценти удел. Клучна одредба од договорот ѝ дава на OSGE целосен пристап до технологијата BWRX-300, која е развиена во САД.

„Ова ќе ѝ овозможи на компанијата да продолжи со процесот што ќе кулминира со изградба на првата нуклеарна централа SMR во Полска на локација од клучно значење за Орлен, во Влоцлавек“, се вели во соопштението.

Како што е познато, во 2023 година, Полска одобри изградба на 24 електрани со мала потрошувачка на вкупно шест локации. Претстојната електрана во Влоцлавек претставува уште еден клучен чекор во пошироката стратегија на земјата за оддалечување од фосилните горива, особено јагленот.

Според извештајот на тинк-тенкот „Форум Енерџи“, во 2019 година, Полска согорела околу 87 проценти од вкупниот јаглен потрошен од домаќинствата во Европската Унија.

Орлен го опиша BWRX-300 како технолошки најнапреден SMR проект во светот.

„Пристапот до овие решенија го става OSGE, а со тоа и Orlen, меѓу пионерите во употребата на оваа технологија“, нагласи Орлен.