Приходите на кинескиот производител на чипови се зголемија за 4.000 проценти

Кинескиот производител на чипови „Кембрикон“ објави рекордна добивка во првата половина од годината, што е во согласност со напорите на Пекинг да ја зајакне својата домашна индустрија и да ја доближи до американската „Нвидија“.

„Кембрикон“ е меѓу многуте компании во Кина кои се борат да бидат алтернатива на американскиот технолошки гигант кога станува збор за обезбедување чипови потребни за обука и работа на апликации и модели за вештачка интелигенција, објави CNBC.

Кинеската компанија објави дека во првата половина од годината нејзините приходи се зголемиле за повеќе од 4.000 проценти во споредба со истиот период минатата година, на 2,88 милијарди кинески јуани (402,7 милиони долари), а нето добивката достигна рекордни 1,04 милијарди јуани (144 милиони долари).

Бројките се сè уште прилично скромни во споредба со „Nvidia“, која објави приход од 44 милијарди долари во последниот квартал во април, а наскоро треба да ги објави и приходите за вториот фискален квартал.

Сепак, зголемувањето на приходите на „Кембрикон“ покажува како технолошките компании во Кина бараат потенцијални алтернативи на „Нвидија“, со оглед на постојаната закана дека би можеле да бидат отсечени од американската технологија.