Скандал ги тресе Израел и Германија: Поранешниот шеф на израелската тајна служба е вмешан во киднапирањето на децата на милионерот
Поранешниот шеф на израелската безбедносна служба Шин Бет и министер за наука во владата на Израел, Јаков Пери (81), е под истрага во Германија за неговата наводна улога во киднапирањето на двете деца на Кристина Блок од домот на нивниот татко во Данска.
Блок моментално е на судење за наводна нарачка на киднапирањето. Наследничката на германскиот синџир ресторани за стек „Блок Хаус“, чие богатство се проценува на стотици милиони евра, заедно со нејзиниот партнер – поранешна телевизиска спортска водителка – наводно ангажирала израелска компанија за деловно разузнавање во 2023 година за да го изврши киднапирањето.
Според весникот „Билд“, обвинителите пред судот во Хамбург изјавиле дека Август Ханинг, поранешниот шеф на германската Федерална разузнавачка служба (еквивалентна на израелскиот Мосад), го контактирал Пери минатата година во име на Блок и го замолил да состави тим за киднапирање на децата од нивниот татко. Таткото тврди дека престојот на децата со нивната мајка би ги загрозил нивните животи. Ханинг негираше каква било поврзаност со случајот, велејќи за весникот дека никогаш не го контактирал Пери.
Германските медиуми објавија дека киднаперите го претепале таткото, а потоа насилно ги однеле неговиот 10-годишен син и 13-годишната ќерка во шумата и низ поток пред да ги фрлат во автомобил. Устите на децата биле залепени со селотејп, а едното од нив било врзано. Киднаперите наводно им се заканиле и дека ќе ги убијат ако направат бучава.
Според извештаите, еден од киднаперите е израелски државјанин кој бил уапсен на Кипар и екстрадиран во Германија, каде што моментално му се суди. Двајца други Израелци осомничени за вмешаност во случајот избегале од Германија.
„Билд“ објави дека Пери му рекол на германскиот суд дека е спремен да сведочи за улогата на Ханинг во случајот доколку му се гарантира доверливост. За време на судењето, адвокатот на таткото ја прашал Блок дали го знае името на Пери, на што таа молчела.
Тврдењето за поврзаноста на Пери со киднапирањето го изнесе Вернер Маус, поранешен германски шпион познат како „германскиот Џејмс Бонд“. Според „Шпигел“, вмешаноста на Пери наводно е поврзана со неговата позиција како претседател на компанијата за деловно-разузнавање CGI Group. Основачот и извршен директор на компанијата, Звика Наве, негираше каква било вмешаност на компанијата во овој случај.
