Со заедничка работа со ОБСЕ до надминување на родовата нееднаквост

Претседателката на Комисијата за еднакви можност на жените и мажите, Жаклина Пешевска, оствари работна средба со Килиан Вал, амбасадор на ОБСЕ во земјава. На средбата присуствуваа и Весна Ѓорѓиева, заменик-претседателка на Комисијата и Лидија Петкоска, членка на Комисијата.

Пешевска изрази благодарност за поддршката и досега остварените проекти со ОБСЕ. Таа информираше дека како општество се соочуваме со големи предизвици, постојат многу закони за родова еднаквост, но има проблеми со нивната имплементација.

Родовата нееднаквост се манифестира на многу полиња, па така стана збор за повеќе теми од оваа област и можни решенија за надминување на предизвиците.

Беше истакната потребата за поголема застапеноста на жените на пазарот на трудот, во насока на подобрување на економската состојба, како еден од клучните фактори. Статистиката вели дека повисокото образование е на страната на жените, но финансиската нееднаквост и натаму постои. Состојбата на терен, пак, покажува дека жените заработуваат, но голем дел од нив не менаџираат со парите, а имаат проблем и со поделбата на имотот.

Насилството врз жените, исто тако, е еден од клучните проблеми и во оваа насока се потребни добри законски решенија за поголема заштита на жените. Мора да се зборува јавно и гласно дека жената не смее да биде жртва на насилство.

Говорот на омраза, вклучувајќи го и јавниот линч, е проблем со кој се соочуваат жените, особено жените во политиката. Мора да се престане со злоупотребата на жените!

Во фокус мора да се стават жените од руралните средини, кои и понатака остануваат недоволно информирани. Во овој контекст да се зголеми степенот на образование, отворено да се разговара на разни теми, да се смени начинот на размислувањето. Има одлични примери за рурални жени, кои треба да се споделуваат и промовираат. Во јавноста да се дава пример за силни и успешни жени.

Беше потенцирано дека со менување на општеството, ќе се направат и саканите промени. Во таа насока, да се работи на едукација на децата од најрана возраст, но и да се работи на влијанието од социјалните мрежи.

Амбасадорот Вал информира дека во земјава се фокусирани на пет приоритети, меѓу кои и родовата еднаквост. Тој изрази подготвеност и отвореност за помош и поддршка за надминување на проблемите.

Присутните беа едногласни дека треба да се направат конкретни промени, со заедничка работа да се дефинираат целите и потоа, со помош на ОБСЕ да се решаваат чекор по чекор поради обемноста на проблематиката.