Ѓоковиќ го откри името на новиот тренер по разделбата со Мареј

Најдобриот тенисер на сите времиња, Новак Ѓоковиќ, неодамна ја заврши соработката со Енди Мареј, кој му беше тренер во последните месеци, а сега откри кој е неговиот нов тренер.

Ѓоковиќ сега очекува настап на турнирот во Женева, а потоа и на Ролан Гарос, а откри дека Душан Вемиќ ќе ја игра улогата на главен тренер.

Во изјава за медиумите, тој нагласи дека во моментов не бара тренер и дека нема да брза, а дека во Женева и Париз, заедно со Вемиќ, ќе го води Борис Бошњаковиќ како аналитичар и помошник тренер.

„Во моментов не барам тренер. Не мислам дека има потреба да брзам во кој било контекст, се чувствувам удобно со луѓето околу мене. Го имам Душан Вемиќ кој е тука – дојде од САД, каде што живее, ќе биде со мене во Женева и на Ролан Гарос, а Борис Бошњаковиќ е тука како аналитичар и помошник тренер. После тоа, ќе видиме“, рече Ѓоковиќ.

Вемиќ има 48 години и е поранешен српски тенисер од Задар, кој ја заврши кариерата во 2011 година. Не може да се пофали со завидна играчка кариера бидејќи неговиот најдобар ранг на АТП ранг-листата е 146-то место од февруари 2008 година.

Неговиот најголем успех на Гренд слем турнирите беше играњето во првото коло на Ролан Гарос во 2007 година.

Дури и по завршувањето на играчката кариера, Вемиќ беше во тимот на Новак Ѓоковиќ кај тогашниот тренер Марјан Вајда.

Ѓоковиќ својот прв меч го игра утре во Женева, а во второто коло од турнирот се среќава со Унгарецот Мартон Фучович.