Австрија забранува бракови меѓу братучеди
Австриската федерална влада презеде важна мерка за заштита на малолетниците и зајакнување на семејното право, предлагајќи забрана за склучување бракови за лица под 18 години, како и забрана за бракови меѓу роднини до четврти степен на крвно сродство, вклучително и бракови меѓу братучеди.
Нацрт-законот беше презентиран во среда од министерката за правда Ана Шпорер (SPÖ) и се очекува да биде одобрен од Националниот совет пред летната пауза, а законот ќе стапи на сила во август 2025 година.
„Во иднина, само лицата кои наполниле 18 години ќе имаат право да стапат во брак или да регистрираат граѓански партнерства“, рече Спорер за време на состанокот на кабинетот, објавија медиумите.
Во моментов, австрискиот закон дозволува бракови за малолетници над 16 години со одобрение од судот и законскиот старател – постапка што често се спроведуваше без длабински проценки на зрелоста и личните околности.
Министерката за семејство Клаудија Плаколм (ÖVP) ја нарече оваа иницијатива „решителен чекор против детските бракови“. Додека претседателот на пратеничката група на NEOS, Јаник Шети, ја поддржа иницијативата, нагласувајќи дека бројот на засегнати случаи е мал – од неколку десетици до неколку стотици низ целата земја.
„Шеснаесетгодишно девојче треба да биде во училиште, а не во матичната служба“, рече Шети, нагласувајќи ја важноста од ограничување на раните бракови за да се заштити развојот и правата на малолетниците.
Според австриската статистика, бројот на бракови каде што барем еден од партнерите бил под 18 години значително се намалил во текот на изминатата деценија – од околу 50 случаи во 2015 година, на само 6 случаи во 2024 година.
Предлог-законот, исто така, предвидува дека обвинителството ќе има право да побара поништување на брак или регистрирано партнерство, во случај еден од партнерите да немал правна способност да склучи таков однос.
Оваа владина иницијатива претставува заклучок на претходен обид на владата на ÖVP-Зелените, која изготви сличен нацрт, но кој не беше одобрен. Со широк политички консензус, се очекува законот да стапи на сила во наредните месеци.
