АЛБАНИЈА ПОВТОРНО ДОЗВОЛИ ИГРИ НА СРЕЌА
Албанија ја поништи одлуката на Законот од 2019 година со кој се укинаа и затворија сите обложувалници на територијата на оваа република! Парламентот на Албанија со 72 гласа „за“ и само два против ја укина забраната за приредување игри на среќа од 2019 година. Одлуката е донесена на предлог на Европската комисија со цел сузбивање на црниот пазар, подигнување на нивото на буџетските приходи и обезбедување на транспарентност во оваа економска активност.
Уште еднаш се покажа дека непромислените одлуки за затворање на обложувалниците се само популистички и контрапродуктивни, односно дека ништо не се менува во пракса – обложувањето продолжува, но преку нерегулиран црн пазар. Тоа неминовно води до зголемување на стапката на криминал, а државата останува без милионите од даноците на легалните играчи.
Албанија со години не успеваше да најде начин да го потисне црниот пазар, па на предлог на Европската комисија, која постојано укажуваше на овој проблем, уште еднаш овозможи легално организирање на игрите на среќа. Тие сфатија дека забраната и ограничувањето е лош потег што не решава ништо на долг рок и само води до уште поголеми проблеми.
Одлуката на највисокото законодавно тело е резултат на повеќегодишна дебата на експерти, економски аналитичари и политички групи, кои континуирано укажуваа на проблемот со црниот пазар и на поголем број случаи на „перење пари“.
Владејачката Социјалистичка партија се надева дека новата регулатива ќе успее да го подигне нивото на јавните приходи и да го подигне нивото на инвестиции во спортските здруженија во Албанија.
