Алтун: Неприфатлив е молкот за приведувањето турски новинари во Германија

Директорот за комуникации при турското Претседателство, Фахретун Алтун, упати критики поради молкот на Западот во врска со притворањето на двајцата турски новинари во Германија поради нивниот напис против терористичката организација ФЕТО, која стои зад неуспешниот обид за пуч во Турција во 2016 година, пишува ТРТ БАЛКАН.

Во објава на Твитер, Алтун рече: „Слепи ги водат слепите! И бесрамната операција против турските новинари кои легално работат во Германија и оние кои молчат за тоа направија нешто сосема неприфатливо.“

Претходно, дописникот на „ТРТ Ворлд“ од Вашингтон побара од заменик-портпаролот на американскиот Стејт департмент, Ведант Пател, да го искоментира приведувањето на турските новинари во Германија.

Пател одби да даде коментар и рече: „Не ги знам подробностите на овој случај.“

Алтун истакна дека „оние кои се осмелуваат да ѝ држат предавања на Турција, каде што стотици странски новинари слободно работат, на секој чекор го открија вистинското лице на нивните таканаречени вредности денес.“

„Сосема е јасно дека оваа операција, насочена кон заплашување на турските новинари, е планирана со претпоставка дека одредени политичари, кои ветија ‘Турција послушна на Западот’ на нивната средба со странските амбасадори, би можеле да победат на 14 мај“, додаде тој.

„Нашата порака е јасна: Вака или онака, ќе се помирите со фактот дека Турција ќе продолжи да биде голема држава која ги брани своите граѓани и која бара одговорност од секој што ќе се осмели да ги повреди под силното водство на претседателот Реџеп Таип Ердоган“, додаде Алтун.

Исмаил Ерел и Џемил Албај, новинари кои работат за турскиот дневен весник „Сабах“, беа приведени во раните утрински часови вчера, откако десетици полицајци упаднаа во нивните домови во германскиот град Франкфурт. Полицијата ги заплени и нивните телефони, лаптопи и електронски мемориски уреди.

Тие беа ослободени неколку часа по приведувањето.