Американскиот генерал предупреди: Руски напад врз Балтикот е реално сценарио, еден град е посебна цел

Поранешниот командант на американската армија за Европа, генерал Бен Хоџис, изјави дека сценариото во кое Русија ги напаѓа балтичките земји е реално и дека треба да се подготви за тоа.

Во интервју за полскиот „Онет“ , Хоџис се согласи со изјавата на премиерот на Полска, Доналд Туск, дека напад врз балтичките земји е можен до 2027 година.

„За жал, мислам дека ова е многу реална можност, особено ако Украина не успее или ако Кремљ добие впечаток дека Соединетите Американски Држави не го поддржуваат целосно Киев или дека Европа не дејствува со потребната решителност. Русија потоа би можела да ја нападне југоисточна Латвија – на пример, Даугавпилс – или Молдавија, што пак би влијаело врз Романија како земја-членка на НАТО“, смета тој.

Даугавпилс е град во близина на белоруската граница.

Тој исто така истакнува дека сега е тешко за НАТО да одговори на заканите од Русија.

„Додека руските провокации остануваат под прагот дефиниран со Член 5, односно нема отворени напади врз територијата на НАТО, тешко ни е да одговориме. Оваа плашливост ја охрабрува Русија. Русите веќе долго време водат војна против нас, дури и ако ние не го признаваме тоа. Но, токму тоа мисли Москва. Мора да најдеме начини да го ограничиме ова и да спречиме понатамошна ескалација“, нагласи тој.

Европа, како што истакнува тој, има клучна улога тука.

„Сепак, во конвенционалните арени ова е помалку важно. Затоа е клучно самата Европа да ги поседува потребните капацитети и Москва да види дека Европа е подготвена да ја одврати Русија доколку е потребно, доколку Соединетите Американски Држави бидат окупирани од ситуацијата во Пацификот“, рече генералот.