Американците и Кинезите започнуваат преговори за царини – светот нетрпеливо го чека ИСХОДОТ: Еве што е на МАСА!

Американските и кинеските претставници започнуваат разговори оваа недела во обид да ја смират трговската војна меѓу двете најголеми економии во светот.

Како што потврди кинеското Министерство за надворешни работи, кинескиот вицепремиер Хе Лифенг ќе учествува на разговорите што ќе се одржат во Швајцарија од 9 до 12 мај. Министерот за финансии Скот Бесент и трговскиот претставник на САД, Џејмисон Грир, ќе ги водат преговорите во име на Соединетите Американски Држави, објавија нивните канцеларии.

Откако Доналд Трамп се врати во Белата куќа, неговата администрација воведе нови царини за кинески стоки, со зголемување до 145%. Кина одговори со контрамерки, воведувајќи царини до 125% за одредени американски производи.

Сепак, аналитичарите за меѓународна трговија изјавија за Би-Би-Си дека очекуваат преговорите да траат со месеци. Ова е прва средба на високо ниво меѓу претставници на двете земји откако кинескиот потпретседател Хан Женг присуствуваше на инаугурацијата на Трамп во јануари.

Американскиот министер за финансии Скот Бесант изјави за „Фокс њуз“ дека со нетрпение очекува да се обиде да го балансира меѓународниот економски систем во корист на САД. „Мислам дека ова ќе биде фокусирано на деескалација на тензиите, а не на постигнување голем трговски договор. Но, прво мора да ја деескалираме за да можеме да продолжиме напред“, рече тој.

Кинеското Министерство за трговија посочи дека, доколку САД сакаат да го решат спорот преку преговори, мора да ги признаат сериозните негативни последици од едностраните царински мерки, не само за Кина, туку и за остатокот од светот.

Преговорите би можеле да потраат.

Кинеските државни медиуми објавија дека Пекинг одлучил да влезе во преговорите откако внимателно ги разгледал очекувањата на меѓународната заедница, интересите на Кина и барањата на американските компании. Тие исто така додаваат дека Кина е отворена за дијалог, но исто така е подготвена да ја продолжи трговската војна „до крај“ доколку е потребно.

Трговската војна предизвика големи превирања на светските финансиски пазари и ја наруши глобалната трговија. Двајца трговски експерти за Би-Би-Си изјавија дека не се особено оптимисти во врска со брзиот напредок на разговорите.

„Мора да се започне некаде, па затоа не велам дека не е корисно. Само се сомневам дека тоа ќе биде големиот момент на кој сите се надеваат“, рече Дебора Елмс, директорка за трговска политика во Фондацијата Хинрих.

„Можеме да очекуваме многу меѓусебни пречки, исто како што имаше во 2018 година“, рече Хенри Гао, професор по право на Сингапурскиот универзитет за менаџмент и поранешен кинески адвокат во Светската трговска организација. Тој додаде дека преговорите би можеле да траат со месеци или дури и повеќе од една година.

Финансиските пазари во континентална Кина и Хонг Конг пораснаа во среда, поттикнати од најавата за разговори и мерки од страна на кинеските власти за поддршка на економијата. Американските берзански индекси во тргувањето со фјучерси исто така забележаа раст, што укажува на позитивен почеток на трговскиот ден.

Инвеститорите исто така со нетрпение ја очекуваат новата одлука на американската централна банка за каматните стапки, која се очекува да биде објавена во среда попладне.