БАШАР АЛ АСАД ПАТУВА ВО КИНА ЗА ПРВ ПАТ ОД 2004 ГОДИНА – Претседателот на Сирија излезе од ‘изолација’ и оди кај Си Џинпинг

Претседателот на Сирија, Башар Ал Асад, во четврток ќе отпатува за Кина на билатерален самит со неговиот кинески колега Си Џинпинг, соопшти денес претседателството во Дамаск.

Башар Ал Асад, неговата сопруга Асма и високата делегација ќе имаат серија состаноци во Пекинг и Чангжу, а двајцата претседатели ќе одржат и сириско-кинески самит, се вели во соопштението, пренесува медиумската агенција Reuters.

Башар Ал Асад последен пат ја посети Кина во 2004 година кога се сретна со тогашниот претседател Ху Џинтао. Тоа беше прва посета на претседател на Сирија на држава на Кина откако двете земји воспоставија дипломатски односи во 1956 година.

Кина, како и главните сојузници на Сирија – Русија и Иран, продолжија да одржуваат врски со Дамаск, иако други земји го изолираа Башар Ал Асад поради задушувањето на антивладините демонстрации во 2011 година, по што избувна граѓанска војна.

Како постојана членка на Советот за безбедност на ОН, Кина постојано стави вето на резолуциите за Сирија, вклучително и неколку за проширување на операциите за прекугранична помош во области надвор од контролата на сириската Влада.

Башар Ал Асад оваа година излезе од дипломатска изолација, а Арапската лига ја врати Сирија како полноправна членка по повеќе од една деценија суспензија.