Блискиот Исток е загрозен од нова ескалација: Израелците тврдат дека уништиле турска опрема во Сирија

Откако израелските сили вчера спроведоа таканаречена „специјална операција“ бомбардирајќи област јужно од Дамаск, израелски безбедносен претставник изјави дека операцијата е „многу важна за безбедноста на Израел“.

Во разговор за „Ал-Хадат“, функционерот потврди дека израелските сили успеале да вратат „тајна и опасна опрема“ што се наоѓала на сириски локации повеќе од десет години.

„Ги следевме движењата на оние што ја преместуваа опремата, стигнавме до местото каде што беше скриена и успеавме да ја вратиме“, нагласи тој.

Според него, за време на операцијата, израелската армија демонтирала и уреди од турско потекло, кои, како што тврди, неодамна биле инсталирани во таа област со цел шпионирање на Израел.

„Ја предупредивме администрацијата во Дамаск да не си игра со оган и да не ги следи наредбите на Анкара. Турција се обидува да се приближи до Израел повеќе од потребното“, рече тој.

Функционерот, исто така, рече дека Тел Авив јасно ѝ ставил до знаење на новата сириска администрација дека не ги тестира границите на трпението или оперативниот капацитет на Израел.

Да потсетиме дека сириската државна агенција САНА објави дека припадници на таканаречената „нова сириска армија“ пронашле уреди за надзор и прислушување во вторникот во близина на планината Мана, јужно од Дамаск. Додека се обидувале да ги отстранат, локацијата била погодена од израелски воздушен напад, при што загинале неколку војници, уништена е воена опрема и предизвикана е поголема штета.

Израел, наводно, продолжил со воздушните напади и нападите со беспилотни летала до доцна во среда, спречувајќи пристап до локацијата. После тоа, извршено е слетување на хеликоптер, со силна поддршка на извидувачката авијација.

Од падот на претходниот сириски режим, Израел ги интензивираше упадите и операциите во јужна Сирија, а воздушните напади продолжија и покрај разговорите меѓу двете страни за можен безбедносен договор.