БОРБА ЗА ВРВОТ ВО ЛА ЛИГА – Пред Реал Мадрид неочекувано дерби: “Ќе биде многу тешко, кој и да победи ќе има предност“
Кој би помислил пред оваа сезона во Ла Лига дека натпреварот помеѓу Реал Мадрид и Жирона во 24. коло ќе биде дерби – пресметка на водечките две екипи во шпанскиот шампионат. Но, тоа е реалноста, денешната пресметка на стадионот „Сантијаго Бернабеу“ би можела да даде одредени одговори за исходот од трката за шампионската титула…
Тимот на Карло Анчелоти е лидер во поредокот со 58 бода, два повеќе од Жирона, тимот од каталонскиот град, па евентуална победа на кралевите би го оставила шампионското изненадување пет бода зад себе. Во случај на реми, Барселона и Атлетико Мадрид ќе имаа можност да се приклучат во борбата за врвот на табелата, а доколку Жирона го земеше целиот плен во Мадрид, повторно ќе стане лидер.
„Натпревар е тежок. Жирона е тим кој работеше многу добро, ќе биде многу тешко. Имаме голема почит кон нив и ќе видиме што ќе се случи. Ми се чини дека ентузијазмот што го има Жирона е многу висок“, изјави искусниот стратег на Реал Мадрид кој исто како и Жирона има само еден пораз во првенството оваа сезона.
Формата на Реал Мадрид во лигата оваа сезона е импресивна, со 18 победи, 4 нерешени и 1 пораз. Кралевите се осум бодови пред третопласираната Барселона и десет пред Атлетико Мадрид, дуото што Реал Мадрид го сметаше за најголем предизвик на почетокот на сезоната, но Жирона се погрижи тоа да не биде случај.
„Факт е дека кој и да победи има предност. Но, сезоната е многу долга, така што ова коло не одлучува ништо. Колку побрзо стигнеме до 80 бода, толку ќе бидеме поблиску до конечниот триумф“, заклучи Карло Анчелоти.
„Кралскиот клуб“ сезонава веќе го освои шпанскиот Суперкуп и „брка“ успех во Лигата на шампионите, следната недела оди во Лајпциг на првиот осминафинален натпревар.
Единствениот првенствен пораз на Жирона оваа сезона беше против Реал Мадрид на 30. септември минатата година, додека тимот на Карло Анчелоти загуби во шпанската лига со 3:1 од Атлетико Мадрид на 24. септември.
