ВЕРСАЈСКИОТ ДВОРЕЦ ЕВАКУИРАН ПОРАДИ ДОЈАВА ЗА БОМБА – Франција ги подигна безбедносните мерки на највисоко ниво

Фамозната палата Версај, една од најпосетуваните туристички атракции во Франција, денес беше евакуирана од безбедносни причини.

Ова е вторпат за четири дена палатата да мора да се затвори, а во Франција тревогата е зголемена поради страв од напад по фаталното прободување со нож на учител во една гимназија.

На профилот на поранешната кралска палата на социјалната мрежа Х (Твитер), се вели: 

„Од безбедносни причини, Версајскиот дворец ги евакуира посетителите и ги затвора вратите денес, вторник, 17 октомври. Ви благодариме за разбирањето“.

Во соопштението немаше други детали.

Палатата, како и музејот „Лувр“ во Париз, исто така беа евакуирани од посетители и персонал во саботата по заканите за бомби.

Франција го подигна нивото на тревога за тероризам по нападот во една гимназија во северниот град Арас минатиот петок од страна на осомничен исламски екстремист.