ВИДЕО | ВИСТИНСКО ЧУДО – Четири деца преживеале 14 дена во џунгла по авионска несреќа, меѓу кои и едно бебе: “Јаделе овошје, а изградиле и засолниште…“

Четири деца, меѓу кои и 11-месечно бебе, се пронајдени живи по повеќе од две недели откако авионот со кој патувале се урнал во густата џунгла во колумбиската провинција Какета.

Децата биле спасени од припадници на војската, пожарникари и претставници на цивилната авијација по двонеделна потрага.

Спасувачите, поддржани од кучиња трагачи, претходно пронашле фрлено овошје кое децата го јаделе за да преживеат, како и импровизирани засолништа направени од вегетацијата од џунглата.

Несреќата се случила на почетокот на мај, кога авионот „Cessna 206“, во кој се превезувале седум лица меѓу Аракуара, провинцијата Амазонас и Сан Хозе дел Гуавијаре, град во провинцијата Гуавијаре, се урнал во џунглата.

Во несреќата загинале тројца возрасни, меѓу кои и пилотот, а нивните тела биле пронајдени во авионот. Четири деца на возраст од 13, девет и четири години, како и едно 11-месечно бебе, кои припаѓаат на домородното население Уитото, ја преживеале авионската несреќа.

„По макотрпна потрага на нашата војска, ги најдовме живи четирите деца кои исчезнаа по авионската несреќа во Гуавијаре“, објави колумбискиот претседател Густаво Петро во објава на социјалната мрежа Твитер.

Џунглата е многу густа и опасна во таа екстремно оддалечена област, а потрагата била отежната поради присуството на диви животни, дрвја високи и до 40 метри и обилниот дожд.

Причините за несреќата се уште не се утврдени. Според цивилната заштита, пилотот пријавил проблеми со моторот на авионот пред да исчезне од радарот.