ВИДЕО | ЕВГЕНИЈ ПРИГОЖИН ПОГРЕБАН НА ПРИВАТЕН ПОГРЕБ ВО РОДНИОТ ГРАД – Церемонијата била во целосна спротивност со агресивниот начин на живот на лидерот на групата Вагнер
Лидерот и основач на групата Вагнер, Евгениј Пригожин, е погребан на приватен погреб на гробиштата во Санкт Петербург, објави неговиот медиумски тим.
Погребот на главниот командант на руските озогласени платеници, кој загина во авионска несреќа минатата недела, бил одржан меѓу семејството и пријателите на гробиштата во предградието на неговиот роден град Санкт Петербург, соопшти денеска канцеларијата за односи со јавноста на Евгениј Пригожин.
„Последното збогување со Евгениј Викторович се одржа во приватен круг. Оние кои сакаат да се збогуваат можат да ги посетат гробиштата Пороховское“, се вели во кратката објава на социјалната мрежа Телеграм со фотографија на Евгениј Пригожин.
Приватната церемонија била во целосна спротивност со агресивниот начин на живот на Евгениј Пригожин, самопромовирање, според медиумската агенција Reuters. Рускиот медиум MSK1.RU го цитираше персоналот на гробиштата дека приватен погреб е желба на семејството.
За Кремљ, ова значеше дека настанот не може да се претвори во големо јавно покажување на поддршка за Евгениј Пригожин, безмилосна личност на која некои во Русија се восхитуваат затоа што ги фрли своите платенички сили во најжестоките битки на војната во Украина и отворено зборуваше за недостатоци на руската војска и нејзиното раководство.
Претседателот на Русија, Владимир Путин, не планира да присуствува на погребот на лидерот на платениците на Вагнер, Евгениј Пригожин, соопшти претходно денеска Кремљ.
Авионската несреќа дојде два месеци откако Евгениј Пригожин и неговите платеници започнаа бунт против највисоките воени команданти на Владимир Путин, во кој ја презедоа контролата врз јужниот град Ростов на Дон и напредуваа кон Москва пред да се вратат назад кога беа на 200 километри од главниот град.
„Присуството на претседателот не е предвидено“, изјави портпаролот на Кремљ Дмитриј Песков за новинарите на прашањето дали Владимир Путин ќе присуствува. Димитриј Песков кажа дека Кремљ нема конкретни информации за погребот организиран од семејството.
Инспекторите во неделата соопштија дека генетските тестови потврдиле дека Евгениј Пригожин бил меѓу 10-те луѓе кои загинале во авионот.
Кремљ ја отфрли како „апсолутна лага“ сугестијата на некои западни политичари и коментатори дека Владимир Путин наредил да биде убиен Евгениј Пригожин како одмазда.
За разлика од приватниот погреб на Евгениј Пригожин, десетици луѓе дојдоа на погребот на Валери Чекалов, еден од замениците на Евгениј Пригожин кој загина со неговиот шеф во авионска несреќа минатата недела.
Reuters јавува дека на семејството на Велери Чекалов, првиот човек на логистиката на Вагнер, му се придружиле десетици луѓе, од кои некои Reuters ги идентификуваше како платеници на Вагнер, на гробиштата Северное во Санкт Петербург.
Руски православен свештеник се молел пред ковчегот на Велери Чекалов додека семејството, пријателите и поранешните колеги, некои држејќи цвеќиња, се простиле, покажа видеото на Reuters.
Некои, меѓу кои и жени и деца со очила за сонце, се приближиле да го бакнат неговиот ковчег. Неидентификувани ожалостени лица на погребот наредиле снимателот и фотографот на медиумската агенција Reuters да престанат да снимаат.
