ВИДЕО | ЕКСПЛОЗИВНО ИНТЕРВЈУ КОЕ ЈА КРЕНА ЕВРОПА НА НОЗЕ – “Мораме да се подготвиме за војна!“
Министерот за одбрана на Германија, Борис Писториус, предупреди дека може да има закана од војна во Европа додека го бранеше одговорот на неговата Влада на новите закани, вклучително и руската агресија и тензиите на Блискиот Исток.
Во интервју за германската телевизија ZDF, Борис Писториус, член на Социјалдемократската партија на Олаф Шолц, кажа дека нациите како Германија ќе мора да ја зголемат способноста на нивните вооружени сили да го одржат мирот во регионот и дека мора да го променат својот менталитет во случај на војна.
„Триесет години мировни дивиденди, 30 години без Варшавскиот пакт како закана значеа дека Бундесверот, како и другите вооружени сили, не се во состојбата во која инаку би биле“, изјави тој за ZDF, а Newsweek го пренесе интервјуто.
За потсетување, руската инвазија на Украина, која започна во февруари 2022 година, шокираше многумина во Европа, каде војна од големи размери немаше по Втората светска војна, а заканата од напад ја немаше од крајот на студената војна во 1990-тите години.
Од почетокот на конфликтот во Украина, некои европски земји ги зголемија трошоците за одбрана, а НАТО ги зајакна силите распоредени долж источното европско крило кое граничи со Русија. Набргу по инвазијата на Украина од Русија, Олаф Шолц најави зголемување на германските воени трошоци за 100 милијарди евра.
„Не можете да ја надоместите потрошувачката за 19 месеци. Ниту преку производство, ниту преку набавка, ниту преку ништо друго. Нашиот стандард за зајакнување на одбраната мора да биде што е можно побрз и енергичен“, изјави Борис Писториус.
„Мора да се навикнеме на идејата дека може да има закана од војна во Европа. Тоа значи дека мора да бидеме подготвени за војна. Треба да ја зајакнеме одбраната и да го подготвиме Бундесверот и општеството за тоа“, нагласува Борис Писториус.
Тој не објасни дали мислел на заканата од Русија или нешто друго, а интервјуто на Борис Писториус крена голема прашина во Европа. Потсетуваме дека ова е земја која се двоумеше да и помогне на Украина и долго време се колебаше поактивно да се вклучи во конфликтот во Источна Европа.
Во јули, германската Влада одобри нацрт-буџет со кој ќе се подигнат трошоците за одбрана на 2 отсто од БДП поставени од НАТО за земјите-членки. Следниот месец, медиумската агенција Reuters објави, цитирајќи владини извори, дека таквата стратегија беше напуштена во корист на петгодишен план од 2%.
Запрашан за загриженоста дека Германија, која бележи висока инфлација од пандемијата, не се прилагодува доволно брзо на заканата од војна, Борис Писториус порача:
„Сè што е скршено за 30 години не може да се надомести за 19 месеци“.
Тој, сепак, додаде дека до крајот на годината Владата ќе посвети повеќе од две третини од „специјалниот фонд“ од 100 милијарди евра за воени договори. Сепак, Борис Писториус предупреди дека проблемот е што договорите сè уште директно не обезбедуваат производство и испорака.
„За тоа повторно е потребно време“, нагласува тој.
Германија се соочи со низа критики за нејзиниот бавен одговор на руската инвазија и за одбивањето да и позајми на Украина некои од нејзините тенкови Leopard додека Киев чекаше да нарача обновени. Откако другите сојузници ги понудија своите, таа се согласи да испрати 18 понови тенкови Leopard.
