Вкупно 28 случаи на голема кашлица во Скопје, од 7 до 12 февруари аплицирани 1.421 доза ДиТеПер

– Вкупно 28 случаи на пертусис, народски кажано голема или магарешка кашлица, се евидентирани на територија на Скопје до утрово, потврди за МИА, доктор Лулзиме Бајрами од Центарот за јавно здравје.

Комисијата за заразни болести, меѓу другото, донесе препорака за прогласување епидемија на голема кашлица во Скопје.

Здравствените власти периодов апелираат до граѓаните да се вакцинираат и себеси и најмладите, со цел да се заштитат од пертусис. Како што нагласуваат, вакцината која се прима на 2,4,6,18 месеци и на 7 години е клучна за да се спречи понатамошно ширење на болеста.

УНИЦЕФ изрази загриженост од растечкиот број случаи на голема кашлица во земјата и од вестите за случаи со мали сипаници во регионот и се придружи кон повикот на здравствените експерти, до родителите и старателите, да ги вакцинираат децата што пропуштиле вакцинација.

Заменик министерката за здравство во техничката Влада, Маја Манолева во понеделникот, одговарајќи на новинарски прашања, рече дека пунктовите во здравствените домови работат со продолжено работно време.

– Конкретно во Здравствен дом Скопје, отворени се дополнителни смени во повеќе поликлиники низ градот и пунктовите за вакцинација дополнително ќе работат и сабота. Точно е дека има гужва. Би повикала на родителите од овие причини во редовните термини за вакцинација да ги вакцинираат своите деца, да не се соочиме повторно со некој ваков бран во понатамошниот период и за морбили и за други заболувања за коишто би требало децата да се вакцинираат во редовниот календар. Но, еве, овозможивме услови да и во овој период дополнително работат пунктови за имунизација со продолжено работно време, рече Манолева.

Манолева одговараше и на новинарско прашање, дали Министерството има поднесено барање до Обвинителството за луѓе кои антивакцерството го споделуваат на социјалните мрежи, со навреди до докторите каде што навистина се кажуваат некои тези против вакцините кои наштетуваат во делот на имунизацијата и родителите им веруваат.

– Во моментот имаме луѓе кои не се доктори, а кои навистина имаат големо влијание според коментарите и нивните следбеници дека нема да ги вакцинираат своите деца.  Падот на имунизација во изминативе години, би рекла две децении е можеби резултат на влијанието и на медиумите, но и на се поголемиот број луѓе коишто го пропагираат антиваксерството кое што не е засновано на медицина базирана на докази. Имено, токму ваквиве ситуации како оваа со пертусисот, како минатата година со морбили, можеби повторно годинава со морбилите да имаме проблем, ако не продолжиме со зголемување на стапката за имунизација, би довеле навистина до сериозни последици по здравјето на нашите граѓани и сметам дека токму ова треба да биде поводот сите ние да видиме кон што одиме, слушајќи ги тие наводи коишто ни ги даваат антиваксерските групи, појасни таа.

Во однос на сезонскиот грип, информираше дека досега се вакцинирани преку 60 илјади луѓе.

– Сѐ уште имаме пациенти коишто се јавуваат со потешка клиничка слика на сезонски грип пред сѐ во болниците, тоа се сепак пациенти коишто имаат многу коморбидитети, дополнителни заболувања кај коишто инфекцијата со сезонски грип дополнително ја комплицира целата ситуација, појасни Манолева.

Во државава има хоспитализирани деца, но и возрасни со пертусис. Надлежните сепак изминатите денови изјавија оти кај нас состојбата е стабилна и за разлика од други држави во регионот, за среќа, немаме смртни случаи. 

Според податоците добиени од Министерството за здравство, само од 7 до 12 февруари биле аплицирани 1.421 доза на вакцина ДиТеПер на скопската територија.

– Во националниот систем за електронска евиденција во здравството – „Мој термин“ во периодот од 01.01.2023 до 10.02.2023 година се евидентирани 7.973 внесени дози од вакцините DTaP-IPV-Hib-HepB, DTaP-IPV-Hib, DTaP-IPV кои содржат компонента против пертусис : (Pentaxim, Hexaxim, Tetraxim). Додека во период од 01.01.2024 до 10.02.2024 година се евидентирани 9.075 дози од вакцините DTaP-IPV-Hib-HepB, DTaP-IPV-Hib, DTaP-IPV кои содржат  компонента против пертусис : (Pentaxim, Hexaxim, Tetraxim),  наведуваат од Министерството за здравство во одговор на прашање од МИА.

Од 07.02.2023 до 12.02.2023 биле аплицирани 385 дози на вакцина ДиТеПер на територија на градот Скопје, додека од 07.02.2024 до 12.02.2024, аплицирани биле 1.421 доза на вакцина на ова подрачје.

– Потребно е да се земе предвид дека бројот на аплицирани дози зависи од бројот на живородени деца во тековната година, укажуваат од МЗ. 

Претседателот на Комисијата за заразни болести, Александар Петличковски, на 7. месецов информираше дека, меѓу препораките е и забрана за прием на деца невакцинирани против пертусис во градинки. Тој, како што појасни тогаш, очекува овие мерки да го поттикнат интересот за вакцинација, бидејќи фокусот е на заштита на најмалите. Како што истакна тој, оваа болест може да биде и е практично тешка, најтешка болест за најмалите.