ВМЕШАНИ ВО КОРУПЦИЈА Стејт Департментот го стави на црната листа кандидатот за Претседател на Северна Македонија

Американскиот Стејт департмент вчера ги стави на „црната листа“ кандидатот за претстојните претседателски избори во Северна Македонија, градоначалникот на скопската општина Карпош, Стевче Јакимовски и поранешната специјална обвинителка Катица Јанева.

Според соопштението на Стејт департментот (state.gov/press-releases), Јакимовски и Јанева биле на таа листа поради „вмешаност во значителна корупција“, „нивните постапки го поткопувале владеењето на правото и вербата на јавноста во демократските институции и јавните процедури“.

Се прецизира дека Јакимовски во својство на градоначалник на општина Карпош бил „вмешан во коруптивни дејствија и дека ја користел службената положба за мешање во процесите на урбан развој и набавки за да извлече бенефиции за себе и за своите соработници. “

Јанева е ставена на „црната листа“ затоа што за време на нејзиниот мандат во поранешното Специјално јавно обвинителство „учествувала во коруптивни дејствија, како и за злоупотреба на политичко влијание и моќ за лична корист“.

Според Стејт департментот, за Јанева има веродостојни информации дека барала и примала мито за да влијае на работата на обвинителството кое било под нејзина надлежност.

На Јакимовски и Јанева, како и на членовите на нивните семејства им е забранет влез во САД.

Заедно со Јанева и Јакимовски, американскиот Стејт департмент го означи и Џабир Жарку, поранешниот градоначалник на косовскиот град Качаник, за „вмешаност во значителна корупција“.

Поранешниот премиер Никола Груевски, поранешниот шеф на државната безбедност и бизнисмен Сашо Мијалков, бизнисменот Јордан Камчев и неговата мајка Ратка, поранешниот вицепремиер за економски прашања, бизнисменот Кочо Анѓушев и градоначалникот на Струга Рамиз Мерко претходно беа на црната листа во САД поради корупција во Северна Македонија (ДУИ).