Во Тетово наврнале 53 литри дожд на метар квадратен

Најмногу дожд во текот на изминатото деноноќие во земјава наврна во Тетово, 53 литри на метар квадратен, потоа Гостивар со 29 литри, Скопје-Зајчев Рид и Крива Паланка со 28, Скопје-Петровец со 15, Маврово со 9 литри, Куманово, Демир Капи и Пожаране со 2, Кавадарци со литар , покажуваат мерењата на Управата за хидрометеоролошки работи (ухмр).

Во првата половина од ноќта времето особено во северните делови беше нестабилно со пороен дожд и грмежи, локално во форма на невреме со пороен дожд, засилен ветер и град. Во втората половина од ноќта времето е стабилно, па утрово насекаде е сончево.

Од УХМР известуваат дека времето претпладне ќе биде сончево и многу топло со мала до умерена облачност.

Попладне се очекува нестабилно време со пороен дожд и грмежи, локално во форма на невреме со засилен ветер и град. Максималната температура ќе достигне од 30 до 38 степени, со УВ индекс 8.