Вучиќ по седницата на Советот за национална безбедност: „Србија не ја прифаќа пресудата против Милорад Додик“
Претседателот на Србија, Александар Вучиќ, на прес-конференцијата ја коментираше пресудата против претседателот на РС, Милорад Додик, и рече дека е донесен заклучок дека пресудата не се прифаќа.
На прес-конференција по состанокот на Советот за национална безбедност на Србија, Вучиќ рече дека партиите од Сараево упатиле закани пред пресудата.
„Пресудата се подготвуваше политички со огромен притисок, до тој степен што политичките партии во Сараево се заканија дека ќе демонстрираат ако нема пресуда. Разговарав со двајца светски лидери, тие ме предупредија каква треба да биде одлуката и однесувањето на Србија. Реков дека разбирам што мислат со тоа, но дека Србија донесува одлуки како суверена држава“, рече тој.
Тој исто така рече дека ова е најтешката ситуација за Србија од 2008 година.
„Прашањето е каде и како ќе заврши ова. Одлуката е сè освен демократска. Таа е спротивна на општите правни принципи, насочена е против РС и српскиот народ“, рече тој.
Потоа тој зборуваше за заклучоците донесени по седницата.
„Второстепената одлука на Судот на Босна и Херцеговина да го осуди претседателот на РС на една година затвор, како и на шестгодишна забрана за политичка активност е најостро осудена. Иако овие одлуки се донесени во 21 век, тие се недемократски и неморални, длабоко спротивни на основните права и во спротивност со Уставот на Босна и Херцеговина. Србија не ја прифаќа горенаведената одлука на Судот на Босна и Херцеговина. Овие пресуди претставуваат дестабилизирачка точка. Политичката ситуација во регионот е сериозно нарушена со тенденција да предизвика меѓуетнички конфликти. Ги повикуваме сите актери на смиреност. Ваквите акти го нарушуваат уставниот поредок на Босна и Херцеговина и ја загрозуваат стабилноста и довербата“, рече Вучиќ.
Тој, исто така, повтори дека Република Србија ќе застане на страната на Република Српска.
„Стабилноста на регионот е витален национален интерес на Србија“, заклучи тој.
