Генералниот секретар на ОН: „Во Газа насекаде е потенцијална зона на убивање“
– Генералниот секретар на Обединетите нации, Антонио Гутереш, изрази загриженост поради моментната ситуација во Појасот Газа, нагласувајќи дека „никаде не е безбедно“ во опколената енклава.
„Екстремното ниво на борби и пустошење во Газа е несфатливо и неоправдано… Насекаде е потенцијална зона на убивање“, истакна Гутереш преку платформата X.
Крајно време е страните во конфликтот да покажат политичка храброст и политичка волја за конечно постигнување договор, додаде тој.
Портпаролот на Гутереш, Стефан Дужарик, исто така, рече дека ОН ги повикуваат сите страни да ги почитуваат своите обврски според меѓународното хуманитарно право и да водат константна грижа „да се поштедат животите на цивилите и цивилните објекти“.
„Понатаму можам да ви кажам дека ние и нашите хуманитарни партнери продолжуваме да им помагаме на семејствата што се раселени од Северна Газа во областите на југ“, изјави тој пред новинарите.
Дужарик рече дека Канцеларијата на ОН за координација на хуманитарни прашања (OCHA) соопштила дека со секоја нова директива за евакуација, семејствата во Газа се принудени да направат невозможен избор: да останат и покрај воените дејства или да бегаат во области со малку простор.
„Нема безбедно место во Газа. Ниту засолништа, ниту болници, ниту таканаречените хуманитарни зони“, нагласи тој.
Прекршувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Газа по нападот на Хамас на 7 октомври.
Според локалните здравствени власти, оттогаш се убиени речиси 38.700 Палестинци, главно жени и деца, а повеќе од 89.000 се повредени.
Повеќе од девет месеци од почетокот на израелскиот напад големи делови од Газа се во урнатини.
Израел е обвинет за геноцид од страна на Меѓународниот суд на правдата, со чија последна пресуда му се наложи веднаш да ја прекине воената операција во јужниот град Рафа, каде што повеќе од еден милион Палестинци побараа засолниште од војната пред почетокот на копнената офанзива на 6 мај.
