Германија во рецесија? Се чека 15 јануари, но оптимизмот паѓа

Германското индустриско производство падна шести месец по ред во ноември, што веројатно укажува дека земјата влегла во рецесија во последниот квартал од 2023 година, објави Блумберг, повикувајќи се на податоци на германската Федерална канцеларија за статистика.

Производството падна за 0,7% во однос на октомври, поттикнато од забавувањето на производството на капитални добра и суровини, додека германските фабрики се борат со падот на глобалната побарувачка, особено од Кина, но и поради високите каматни стапки и скапата енергија, покажуваат податоците.

Разочарувачките податоци за производството во ноември и неодамнешното влошување на деловните очекувања укажуваат на тежок почеток на годината за германската индустрија.

„Го одржуваме нашиот основен поглед за скромниот раст на БДП во К-1 2024 година, поттикнат од посилната динамика во услужните сектори. Сепак, постои значителен ризик дека поизразената индустриска слабост повторно ќе ја повлече економијата во првиот квартал 2024 година“, напишаа економистите на Блумберг.

Аналитичарите додаваат дека најголемата економија во ЕУ најверојатно паднала во рецесија на крајот од минатата година, бидејќи очекуваат дека податоците доспеани на 15 јануари ќе откријат второ последователно намалување на индустриското производство во четвртиот квартал од 2023 година.

Податоците за индустриското производство доаѓаат еден ден по извештајот кој покажува дека нарачките на германските фабрики се зголемиле со побавно од очекуваното темпо во ноември – само 0,3 отсто, што е далеку под очекувањата на аналитичарите за зголемување од 1,1 отсто.

Потсетуваме дека во моментов во Германија се одржуваат големи протести: едниот протест го организираат земјоделците, кои се незадоволни од укинувањето на субвенциите за гориво, а другиот штрајк го спроведуваат машиновозачите кои сакаат помалку работни часови, подобра плата и еднократен бонус.