Германија и Полска ветија дека ќе ја зајакнат одбранбената соработка

– Германија и Полска денес ветија дека ќе ја подобрат нивната безбедносна и одбранбена соработка за справување со растечките закани од Русија.

Германскиот канцелар Олаф Шолц рече дека Германија и Полска се свесни дека можат да ги совладаат денешните предизвици само со заеднички активности и дека се решени да преземат поголема одговорност за одбрана на границите на Европа.

„Безбедноста на Германија и Полска е неразделна, односно безбедноста на Полска е и безбедност на Германија, ние се залагаме еден за друг како соседи, како сојузници во НАТО, како партнери во ЕУ“, рече тој на заедничката прес-конференција со полскиот премиер Доналд Туск во Варшава.

Шолц рече дека за време на меѓувладините консултации денес, тие се согласиле да ја прошират својата соработка на полето на безбедноста и одбраната, со здружување и координирање на нивните воени капацитети, и зајакнување на заедничките европски одбранбени иницијативи.

„Конкретно, ова значи дека заедно преземаме водечка улога во регионот на Балтичкото Море и во заштитата на источното крило на НАТО“, рече Шолц, додавајќи дека Германија и Полска, како водечки европски нации кои ја поддржуваат Украина, ќе продолжат да обезбедуваат оружје и муниција за украинската војска.

„Со својот напад врз Украина, Путин го прекрши меѓународното право, го уништи европскиот мир и безбедносен поредок и ја загрози безбедноста на целиот континент. Заедно стоиме цврсто на страната на Украинците во нивната неуморна борба против руската империјалистичка војна“, рече тој.