Германија на работ на колапс? Компаниите бегаат безглаво поради скапата енергија, даноците и бирократијата

Германските индустриски компании се повеќе го префрлаат производството во странство, а главната причина се производствените трошоци, соопшти Германската индустриска и трговска комора (ДИХК).

Цитирајќи го сопственото истражување, ДИХК вели дека 35 отсто од компаниите се одлучиле на овој чекор поради високите цени во земјата – највисоки од финансиската криза во 2008 година.

– Заминувањето на компаниите поради скапата енергија, парализираната бирократија и растечкото даночно оптоварување испраќа опасен сигнал – изјави членот на извршниот одбор на ДИХК, Фолкер Трајер.

Студијата е објавена во време кога германските демохристијани и социјалдемократи почнуваат да подготвуваат програма за идната коалициска влада.

Во подготвителната фаза од преговорите, двете страни се договорија да се олесни товарот на стопанството со намалување на даноците за струја барем до европскиот просек, како и со намалување на бирократијата.

Претседателот на ДИХК, Питер Адријан, тогаш изјави дека „на економијата и треба повеќе слобода, помалку трошоци и поефикасна администрација“.

– Ни треба пресврт. „Германија ја губи инвестициската трка“, рече сега Трајер.

Странските инвестиции во Германија долго време првенствено служат за обезбедување пристап до домашниот пазар. Тој мотив е сè уште присутен, но се одржува на повеќегодишен просек од 30 проценти.

Речиси две третини од компаниите, или 64 отсто, ја наведоа еврозоната како најважна област за инвестирање, додека Северна Америка доби на важност од претходното истражување.

Уделот на компаниите кои планираат да инвестираат во Америка се зголеми од 45 на 48 проценти. Во исто време, во Германија речиси две петтини од компаниите планираат да ги намалат инвестициите.