Дали е подобро да се зема магнезиум наутро или навечер? Еве од што зависи

Магнезиумот е суштински минерал кој игра клучна улога во многу функции на телото. Иако може да се добие преку исхрана, често се препорачува да се користи магнезиум како додаток во исхраната за да се обезбеди оптимално ниво во организмот.

Земањето магнезиум  има бројни здравствени придобивки, од поддршка на мускулната функција и здравјето на срцето до подобрување на спиењето и менталното здравје.

Пред да започнете да земате магнезиум, се препорачува да се консултирате со вашиот лекар за да ја одредите соодветната доза и да бидете сигурни дека тоа е вистинскиот избор за вас.

Магнезиумот е неопходен за правилно функционирање на мускулите , вклучително и нивно опуштање по контракцијата. Недостатокот на магнезиум може да доведе до мускулни грчеви, слабост и замор. Редовното внесување на магнезиум може да помогне да се спречат овие проблеми.

Одличен е за здравјето на коските 

Иако калциумот често се смета за најважен минерал за коските, магнезиумот е исто така клучен за здравјето на коските. Учествува во метаболизмот на калциумот и придонесува за одржување на густината на коските, а со тоа го намалува ризикот од остеопороза . Магнезиумот, исто така, помага во регулирање на нивото на шеќер во крвта , што е особено важно за луѓето со дијабетес или за оние кои се изложени на ризик да развијат оваа болест. Може да го намали ризикот од срцеви заболувања, помага во регулирање на крвниот притисок, одржување на редовен срцев ритам и го намалува ризикот од артериски наслаги.

Го смирува нервниот систем

Магнезиумот има смирувачки ефект врз нервниот систем, што може да помогне да се подобри квалитетот на сонот. Овој минерал помага при несоница и нарушувања на спиењето. Исто така, жените кои страдаат од предменструален синдром (ПМС) може да доживеат олеснување по земањето магнезиум. Може да ги намали грчевите, надуеноста , промените во расположението и другите непријатни симптоми поврзани со оваа состојба.

Магнезиумот е поврзан со регулирање на расположението и намалени симптоми на депресија и анксиозност. Доволното ниво на магнезиум во телото може да помогне да се намали стресот и да се подобри целокупното ментално здравје.

Кое е најдоброто време од денот за земање магнезиум? 

Кога да земате магнезиум зависи од вашите специфични потреби и причината поради која го земате овој додаток во исхраната. Можете да земате магнезиум и наутро и навечер.

• Ако вашата цел е да го подобрите сонот и да се опуштите , најдобро е да го земате навечер, бидејќи може да го намали стресот и анксиозноста.
• Ако често имате ноќни грчеви во мускулите , земањето магнезиум навечер може да помогне да се спречат овие проблеми. Исто така, може да помогне во обновувањето на мускулите и да го намали воспалението ако сте биле исклучително физички активни во текот на денот или сте имале одреден тренинг.
• Од друга страна, доколку сакате да имате енергија во текот на денот, функционални мускули и правилно варење, магнезиумот најдобро се зема наутро. Ова е особено корисно за луѓето кои се занимаваат со физичка активност или кои се чувствуваат уморни во текот на денот.

Исто така, можете да ја поделите дозата на магнезиум и да земате една наутро и една навечер.