Двајца Палестинци убиени во Наблус, конфликтот меѓу израелската армија и екстремистите во Газа продолжува

– Двајца Палестинци се убиени денеска во напад на израелската армија во Наблус, на Западниот брег, а судирите меѓу израелската армија и палестинските екстремисти во Појасот Газа, кои започнаа во вторникот, продолжуваат.

Сè уште нема извештаи за евентуални жртви во Газа и Израел, а Министерството за здравство на Западниот Брег идентификуваше двајца убиени Палестинци и соопшти дека уште три лица се ранети во воен напад во бегалскиот камп Балата во Наблус.

Палестинците кои се убиени денеска биле меѓу група луѓе кои протестирале фрлајќи камења и експлозиви кон војниците, но не било планирано да бидат уапсени.

Во меѓувреме, надежите за договор за прекин на огнот пропаднаа откако израелски воени авиони рано утринава нападнаа стан на командантот на Исламскиот џихад Абу ал-Ата и други згради во густо населени населби.

Екстремистите на Исламски џихад истрелаа канонада од ракети кон јужен Израел, каде што на жителите им беше наложено да останат блиску до засолништата.

Израелските власти соопштија дека сè уште се во тек напорите за постигнување прекин на огнот предводен од Египет, но оти Израел ги отфрлил условите на Исламски џихад во разговорите.

Како што беше наведено, израелските власти рекоа дека на затишјето ќе се одговори на ист начин, додека Исламски џихад, наводно, врши притисок врз Израел да се согласи да ги запре целните убиства, меѓу другите барања.

Израелски официјален претставник изјави за локалните медиуми дека „нападите (врз Газа) ќе продолжат и ќе се интензивираат“ доколку продолжи ракетниот истрел од Газа.

Судирите избувнаа во вторникот кога израелската војска уби тројца команданти на Исламски џихад за кои тврди дека се одговорни за минатонеделните ракетни напади врз Израел.