Димитриеска-Кочоска: Економскиот раст денес е благодарение на приватниот сектор, градежништвото бележи значителен раст

„Економските индикатори во одредени сектори конечно покажуваат позитивни резултати. Задоволен сум што по долго време, податоците за бруто-домашниот производ (БДП) покажуваат дека приватниот сектор е главен двигател на економскиот раст во нашата земја, со особено силно учество во градежништвото и земјоделството.“

Ова го истакна министерката за финансии, Гордана Димитриеска-Кочоска, во емисијата „Бизнес21“ на „ТВ21“, подвлекувајќи го аспектот дека денес, растот не зависи од јавната потрошувачка, туку од активностите и инвестициите на приватните компании.

„Повеќе ме охрабрува фактот што приватниот сектор создава нови можности, инвестира во развој и ја стимулира продуктивноста на економијата. Градежништвото бележи значителен раст, што директно влијае на развојот на инфраструктурата, додека земјоделството, по многу години негативни резултати, покажува позитивна динамика во текот на последните два квартала. Ова е јасен показател дека сме на вистинскиот пат и дека постигнуваме резултати во согласност со она што го планиравме како Влада“, нагласи министерот.

Министерот додаде дека, и покрај предизвиците во јавниот сектор и пазарните ограничувања, приватните компании продолжуваат да ја стимулираат економијата, придонесувајќи за стабилноста и одржливоста на бруто домашниот производ.

„Најмногу ме радува фактот што растот во моментов го генерира приватниот сектор, кој е двигател на економијата, а не јавната потрошувачка, како што беше случај во минатото“, нагласи Димитриеска-Кочоска.

Министерот истакна дека Владата останува посветена на создавање услови за понатамошен развој на приватниот сектор .