Димитровски: Наредбите од Вашингтон се дека треба да продолжи дијалогот Скопје-Софија

Наредбите кои доаѓаат од Вашингтон се дека треба да продолжи дијалогот меѓу Скопје и Софија. Со други зборови, доколку дијалогот мора да продолжи, тоа значи и да се најде решение, изјави вечерва заменик министерот за надворешни работи и надворешна трговија Зоран Димитровски.

Тој нагласи дека нашиот интегративен пат зависи од тоа дали Софија ќе ја подигне „рампата“ во иднина. Како што рече, има застој во работата на Историската комисија меѓу Скопје и Софија.

„Очекуваме легитимна влада од Софија. Гледаме дека работите таму повторно водат кон нови избори. Се надевам дека проевропските сили ќе се вратат на власт во Софија и оние сили кои рационално ќе сфатат дека Македонија и Бугарија во иднина треба да живеат како две добрососедски држави, членки, со меѓусебно почитување, а не со понижување и прифаќање на идентитетот на Македонците. , додаде Димитровски кој гостуваше во телевизијата „Канал 5“.

Запрашан за дијалогот со Атина и дали очекува средба меѓу премиерите Кирјакос Мицотакис и Христијан Мицкоски или на ниво на министерствата за надворешни работи, тој рече дека би било корисно да се одржи таква средба.

„Немам предупредувања, но мислам дека би било корисно да се одржи таков состанок и да се продолжат разговорите и едноставно да се релаксираат меѓусебните односи. Она што е многу поважно, и покрај разликите, е продолжување на економските и културните врски со Бугарија и Грција“, подвлече заменик министерот Димитровски.