Додик: Само волјата на народот има легитимитет
Милорад Додик денес изјави дека само волјата на народот има легитимитет, а не „волјата на декрет или неизбран странец“.
Додик за РТРС изјави дека седницата на Народното собрание на Република Српска е доказ дека ситуацијата во Српска е стабилна.
„Оваа одлука за референдумот е доказ. Ние сме фокусирани на мирот и функционирањето“, истакна Додик . Тој рече дека нема да има никаква форма на насилство и дека одлуките ќе се донесуваат на демократски начин со испитување на волјата на народот.
„Тие се единствените што ни држат лекции, тие заспани демократи.
Европа е лажна приказна. Ќе се сруши следната година. Тие немаат економија, кога ги слушавте како зборуваат за човекови права. Нема ништо од европската интеграција. Не успеа“, рече Додик.
Тој потсети дека самиот работел на европски прашања и верувал во таа приказна.
„Тие знаат дека секое мое појавување на изборите е моја победа. Тоа го кажуваат и анкетите… Мојата понуда е следнава – да ги вратиме надлежностите на Република Српска – да го избере својот претседател, својот парламент и локалните заедници и да ни ја врати таа форма на суверенитет, јас нема да се кандидирам. Важно ми е Српска да го добие она што ѝ припаѓа“, нагласи Додик.
Тој истакна дека само народот може да располага со суверенитетот.
„Ќе одржиме референдум, не сакам насилство, но сакам народот да се изрази на референдумот. Ќе ја почитувам волјата на народот, а зошто Шмит не го почитува тоа? Што е одлучувачко – волјата на народот или волјата на декретот? Затоа ја спречуваат оваа приказна. Не морам да бидам во право или да бидам сакан, но невозможно е да сум 100 проценти погрешен“, рече Додик.
Народното собрание на Република Српска усвои одлука за распишување референдум во врска со пресудата на Судот на БиХ против Милорад Додик и одлуката на Централната изборна комисија на БиХ за престанок на мандатот на Додик и утврди дека референдумот ќе се одржи на 25 октомври.
Прашањето на референдумот е „Дали ги прифаќате одлуките на неизбраниот странец Кристијан Шмит и неуставните пресуди на Судот на БиХ изречени против претседателот на Република Српска, како и одлуката на ЦИК за одземање на мандатот на претседателот на Српска Милорад Додик“.
