Еве ги казните кои го чекаат Apple доколку не ги почитува законите во Европа

Ова ќе биде прв пат Apple да биде казнет според Законот за DMA.

Европската комисија во март објави дека започнува истрага за новата структура за наплата на Apple за алтернативни продавници за апликации, а компанијата од Купертино сега се соочува со дневни казни до 50 милиони долари.

Apple наплаќа таканаречен Core Technology Fee на програмерите кои сакаат да ги насочат корисниците надвор од App Store, а има дополнителни три проценти за компанијата доколку развивачот ја користи неговата услуга за плаќање. Наметнувањето такви давачки за програмерите се смета за прекршување на Законот за дигитални пазари (DMA), според новиот извештај на Financial Times.

Тоа ќе биде прв пат Apple да биде казнет според законот DMA, чии ефекти почнаа да се чувствуваат на почетокот на оваа година.

Официјална потврда на обвиненијата се очекува во наредните недели, велат добро упатени извори. „Епл“ се соочува со казна до пет проценти од глобалниот дневен промет поради прекршување на законот. Во „превод“, тоа се околу 50 милиони долари дневно.

Сепак, не е сигурно дека казната навистина ќе се случи, бидејќи работите се сложени. Компанијата сепак може да преземе мерки и да ја коригира својата практика според барањата на Европската комисија.