Европската Унија е подготвена да понуди договор вреден 50 милијарди долари за да ги избегне царините на Трамп
Европската Унија е подготвена да го зголеми купувањето на американски стоки за 50 милијарди долари за да избегне трговска војна, односно стапување во сила на царините воведени од американскиот претседател Доналд Трамп, откри Марош Шефчовиќ, еврокомесарот за трговија.
Како што истакна Шефчовиќ во изјава за „Фајненшл тајмс“, овој договор би бил валиден само ако Трамп се откаже од воведувањето на царини што ги најави за стоки увезени во САД од ЕУ.
Шефчовиќ рече дека клучниот аргумент што им го презентирал на американскиот трговски претставник Џејмисон Грир и министерот за трговија Хауард Лутник бил да се земе предвид извозот на услуги од САД во ЕУ, што би го намалило вкупниот трговски дефицит со Европа на само околу 50 милијарди евра.
Тоа, рече тој, би можело брзо да се затвори со договори за купување повеќе американски гас и земјоделски производи.
„Ако она што го гледаме како проблем е дефицитот од 50 милијарди евра, верувам дека навистина можеме многу брзо да го решиме тој проблем со купување на течен природен гас, некои земјоделски производи како соја или во други области“, рече Шефчовиќ.
Сепак, тој предупреди дека ќе биде „многу тешко“ да се постигне договор што би бил „јасно добар и прифатлив за нашите земји-членки и за Европскиот парламент“.
„Она што е многу важно е што, мислам, сега се разбираме малку подобро – каква е нивната позиција, од каде доаѓаат. И мислам дека тие нè разбираат малку подобро сега. Мислам дека сега имаме малку повеќе разбирање кога станува збор за бројките“, додаде тој.
Шефчовиќ рече дека потенцијалните комбинирани тарифи со кои Трамп ѝ се закани на ЕУ се „астрономски бројки“ и дека блокот „јасно им кажа на САД дека ова е неправедно и нефер“.
На прашањето дали би прифатил царина од 10 проценти како почетна точка во трговските преговори, Шефчовиќ рече дека ЕУ смета дека тоа е „многу висока стапка“, што укажува дека блокот нема да се согласи на договор што би ги задржал царините на тоа ниво.
