Единаесет Палестинци загинаа во израелските напади врз шаторите во јужниот дел на Појасот Газа

– Најмалку 11 Палестинци загинаа, а десетици се повредени во израелскиот напад врз шаторите на раселените луѓе во градот Рафа, во јужниот дел на Појасот Газа.

Медицински извори изјавија за Анадолу дека најмалку 11 Палестинци загинале, а над 40 се повредени во израелското бомбардирање насочено кон шаторите на раселените лица во областа Ал-Маваси, во западниот дел на градот Рафа.

Израел, прекршувајќи ја Резолуцијата на Советот за безбедност на Обединетите нации со која се бара итен прекин на огнот, се соочи со меѓународна осуда поради континуираната брутална офанзива врз Газа од нападот на палестинската група Хамас на 7 октомври 2023 година.

Според локалните здравствени власти, оттогаш во Газа се убиени над 37.700 Палестинци, од кои повеќето жени и деца, а над 86.400 се повредени.

Во текот на осум месеци од почетокот на израелската војна огромни делови од Газа се во урнатини, а постои и блокада за храна, чиста вода и лекови.

Израел е обвинет за геноцид пред Меѓународниот суд на правдата, со чија последна пресуда му се наложи веднаш да ја прекине својата воена операција во јужниот град Рафа, каде што над еден милион Палестинци побараа засолниште од војната пред да започне копнената офанзива врз градот на 6 мај.